საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის მეოთხე კურსის სტუდენტმა მარიამ კიკნაძემ არაერთი წარმატება მოიპოვა. მან 2013 წელს დაამთავრა ქალაქ თბილისის 24-ე საჯარო სკოლა და ჩააბარა საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტზე, საერთაშორისო ურთიერთობების განხრით. 2015/2016 წლის გაზაფხულის სემესტრში Erasmus+ – ის გაცვლითი პროგრამის ფარგლებში, იყოფებოდა ახლო აღმოსავლეთის ტექნიკურ უნივერსიტეტში, ეკონომიკისა და ადმინისტრაციული მეცნიერებების ფაკულტეტზე, კერძოდ საერთაშორისო ურთიერთობებისა და პოლიტიკური მეცნიერებების მიმართულებით. მნიშვნელოვანია, რომ Middle East Technical University თურქეთის წამყვანი უნივერსიტეტია და მსოფლიოს 85 საუკეთესო უნივერსიტეტს შორის არის შესული. Erasmus+-ს გაცვლითი პროგრამა იყო უმნიშვნელოვანესი გადაწყვეტილება და გამოცდილება აღმოჩნდა მის ცხოვრებაში. პირველ რიგში, მან შეიძინა მრავალი მეგობარი და გაეცნო მსოფლიოს კულტურას, ისწავლა დამოუკიდებლად ცხოვრება და სირთულეების გადალახვა. 2017 წლის მარტში სტამბულში მონაწილეობა მიიღო ბილგესამის სტრატეგიული კვლევითი ცენტრის, პირველი ზამთრის საგარეო პოლიტიკურ სკოლაში, (Wise Men Center For Strategic Studies (Bilgesam)Foreign Policy Winter School) . საგარეო პოლიტიკურ სკოლაში მისი ლექტორები იყვნენ თურქეთის ყოფილი ელჩები სირიასა და ერაყში, ალჟირსა და საბერძნეთში. საინტერესო სემინარებს თან ერთვოდა, დისკუსია სადაც 14 ქვეყნის წარმომადგენელი ერთმანეთს უზიარებდა გამოცდილებასა და ხედვებს. ასევე, იმყოფებოდა Kadir Has University, Co-opinion II.Annual Youth Summit “Youth Empowerment: Socio-Economic Inclusion of Young People” 2500 აპლიკანტს შორის აირჩიეს 70 აპლიკანტი და მათ შორის საქართველოდან მხოლოდ მარიამ კიკნაძე იყო წარმოდგენილი.

საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის დეკანი პროფესორი ირაკლი გაბისონია მხარს უჭერს სტუდენტებს, რომლებიც აქტიურად მონაწილეობენ გაცვლით პროგრამებში და სხვადასხვა საგანმანათლებლო ღონისძიებებში. იგი გამოთქვამს  მზადყოფნას  ყველა სტუდენტს მისცეს შესაძლებლობა მიიღონ მონაწილეობა გაცვლით პროგრამებში.

2017 წლის 25 მაისს საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ბაზაზე შექმნილი საერთაშორისო ურთიერთობების კლუბის ორგანიზებით   საქართველოს პარლამენტის ეროვნული ბიბლიოთეკის საკონფერენციო დარბაზში გაიმართა საჯარო ლექცია “ორატორული ხელოვნება და დიპლომატია“.

ლექციას უძღვებოდა ორატორული ხელოვნების აკადემიის დირექტორი, პროფესორი დავით ჩომახაშვილ-ორბელიანი, რომელმაც სალექციო დრო დაუთმო სტუდენტებისათვის პრაქტიკული და თეორიული ინფორმაციის გაზიარებას. მან დამსწრე საზოგადოებას გააცნო საჯარო გამოსვლის მთავარი ასპექტები, მეტყველების კულტურის ამაღლება, ღია საჯარო გამოსვლების წარმართვის ხერხები და მეთოდები, მსმენელზე ზეგავლენის მოხდენის ეფექტური ინტონაციები. კამათსა და პოლემიკაში წარმატების მიღწევის ფორმალურ-ლოგიკური გარანტიები, ეთიკა და პიარი.  ასევე ისაუბრა ისეთ მნიშვნელოვან საკითხებზე, როგორიცაა მეტყველების კულტურის ამაღლება, ადამიანის დათანხმება და კრიზისულ სიტუაციებში გამართულად მოქმედება. შეეხო ადამიანისთვის დამახასიათებელ შიშებს და ემოციებს, რომელიც ხელს უშლის თითოეულ ჩვენგანს წარმატების მიღწევაში.

შეხვედრის მეორე ნაწილი წარიმართა ინტერაქტიულ რეჟიმში, სტუდენტებმა არაერთი შეკითხვა დაუსვეს პროფესორ დავით ჩომახაშვილ-ორბელიანს, რომელმაც  პრაკტიკული მაგალითებით გააცნო სტუდენტებს მათთვის საინტერესო ყველა დეტალი.

საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ბაზაზე შექმნილი საერთაშორისო ურთიერთობების კლუბის დამფუძნებლები მადლობას უხდიან ორატორული ხელოვნების აკადემიის დირექტორს, პროფესორს დავით ჩომახაშვილ-ორბელიანს ერთობ საინტერესო საჯარო ლექციის ჩატარებისათვის და გამოთქვამენ იმედს,  რომ  სამომავლოდ კვლავ გაგრძელდება მათი თანამშრომლობა.

ხუთშაბათს, 29 ივნისს, 12 საათზე საქართველოს ტექნიკური უნივერსიტეტის ადმინისტრაციული კორპუსის,შეხვედრებიის ოთახში (meeting room), სამართლისა და საერთაშორისო ურთიერთობების ფაკულტეტის ორგანიზებით, გაიმართება საჯარო ლექცია თემაზე – „ საქართველო და უსაფრთხოება“.

ლექციას წაიკითხავს საქართველოს დაზვერვის სამსახურის ანალიტიკური მიმართულების ხელმძღვანელი ლაშა დარსალია.

შეხვედრას დაესწრებიან სამართლისა და საერთაშორისო ურთიერთობების ფაკულტეტის სტუდენტები და პროფესორ-მასწავლებლები.

2017  წლის 23 ივნისს საქართველოს მეცნიერებათა ეროვნული აკადემიის სააქტო დარბაზში გაიმართა საჯარო ლექცია თემაზე: „დამოუკიდებელი ყაზახეთი, ისტორია და თანამედროვეობა“,რომელსაც ესწრებოდნენ საქართველოს ტექნიკური უნივერსიტეტის სამართლისა და საერთაშორისო  ურთიერთობების ფაკულტეტის, საგანმანათლებლო პროგრამების კურატორი, ისტორიის დოქტორი, პროფესორი მაია ყიფიანი, სამართლისა და საერთაშორისო  ურთიერთობების ფაკულტეტის, საერთაშორისო ურთიერთობების  მიმართულების რუსულენოვანი საბაკალავრო პროგრამის ხელმძღვანელი, პოლიტიკურ მეცნიერებათადოქტორი, ასოცირებული პროფესორი ნონა ლომიძე, პოლიტიკურ მეცნიერებათა დოქტორი, ასისტენტ პროფესორი ემილია ალავერდოვი,  და ამავე ფაკულტეტის  ქართული და რუსული სექტორის სტუდენტები.

საჯარო ლექცია წაიკითხა   ყაზახეთის რესპუბლიკის საგანგებო და სრულუფლებიანმა ელჩმა პროფესორ ერმუჰამეტ ერტისბაევმა.

 საჯარო ლექციაზე განიხილა არაერთი მნიშვნელოვანი საკითხი, მათ შორის,  საქართველო–ყაზახეთის პოლიტიკურ, სავაჭრო–ეკონომიკურ და კულტურულ სფეროებში ორმხრივი თანამშრომლობის პერსპექტივები.

დეტალურად მიმოიხილა ყაზახეთის  რესპუბლიკის პრეზიდენტის, ნურსულთან ნაზარბაევის  ქვეყნის განვითარების სტრატეგიული გეგმა სახელწოდებით ,,ყაზახეთის მესამე მოდერნიზაცია: გლობალური კონკურენტუნარიანობა’’რომლის განხორციელება იგეგმება   ყაზახეთის რესპუბლიკაში  2025 წლისთვის.  მომხსენებელმა ასევე გამოყო ქვეყნის განვითარების ხუთი ძირითად პრიორიტეტი.

 პირველი პრიორიტეტი–ეს ეკონომიკის დაჩქარებული ტექნოლოგიური მოდერნიზაციაა.

მეორე პრიორიტეტი– ბიზნესგარემოს კარდინალური გაუმჯობესება და გაფართოება.

მესამე პრიორიტეტი– მაკროეკონომიკური სტაბილურობა.

მეოთხე პრიორიტეტი– ადამიანური კაპიტალის ხარისხის გაუმჯობესება.

მეხუთე პრიორიტეტი– ინსტიტუციური გარდაქმნა, უსაფრთხოება და კორუფციასთან ბრძოლა.

აღნიშნული საკითხები სტუდენტებისთვის ერთობ საინტერესო აღმოჩნდა, დაისვა მრავლი შეკითხვა.

სამართლისა და საერთაშორისო ურთიერთობების ფაკულტეტის საერთაშორისო ურთიერთობების მიმართულების, რუსული სექტორის  მესამე კურსის  სტუდენტმა სპარტაკ  ბეკვერიამ  გამოთქვა ინიციატივა  სამომავლო ერთობლივი პროექტის შესახებ  ტელეხიდების ფორმატში  ქართველ და ყაზახ სტუდენტებს შორის, რაზედაც ელჩი სიამოვნებით დათანხმდა.

სტუ–ს  პროფესორებმა მადლობა გადაუხადეს  ყაზახეთის რესპუბლიკის საგანგებო და სრულუფლებიან ელჩს პროფესორ ერმუჰამეტ ერტისბაევს  საინტერესო ლექციის ჩატარებისათვის და მიიწვიეს 2017 წლის სტუ–ს კურსდამთავრებულების გამოსაშვებ  ცერემონიალზე.

2017 წლის 21 ივნისს საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტი „სტუდენტური დღეები 2017“-ს გამარჯვებული და გრანპრის მფლობელი გახდა.

2017 წლის მარტში საქართველოს ტექნიკურ უნივერსიტეტში დაიწყო პროექტი „სტუდენტური დღეები 2017“. პროექტს ჰქონდა  კონკურსის სახე და მასში მონაწილეობდა  საქართველოს ტექნიკური უნივერსიტეტის 11 ფაკულტეტი და ყველა სასწავლო საფეხურის სტუდენტი.
პროექტი მიზნად ისახავდა  ჯანსაღი ცხოვრების წესის პოპულარიზაციას ახალგაზრდებში, შეზღუდული შესაძლებლობის მქონე სტუდენტების ინტეგრაციასა და სტუდენტებში კულტურის, საგანმანათლებლო და სპორტული აქტივობებისადმი ინტერესის ამაღლებას.

პროექტის ფარგლებში გაიმართა მრავალი კულტურული, სპორტული და ინტელექტუალური ატივობა, რომელშიც მონაწილეობას იღებდა სტუ-ს ყველა ფაკულტეტი.

2017 წლის 21 ივნისს „სტუდენტური დღეები 2017“ საზეიმოდ დაიხურა, გაიმართა გალა კონცერტი და საზეიმო ვითარებაში დაჯილდოვდა გამარჯვებული ფაკულტეტი.

სამართლისა და საერთაშორისო ურთიერთობების ფაკულტეტის დეკანი და მთლიანად ფაკულტეტი ყოველთვის მზად არის მხარი დაუჭიროს და წაახალისოს მსგავსი აქტივობები და სიამაყით ულოცავს სტუდენტებს გამარჯვებას.

 2017 წლის, 23 ივნისს, 12:00 საათზე  საქართველოს მეცნიერებათა ეროვნული აკადემიის სააქტო დარბაზში გაიმართება  ყაზახეთის რესპუბლიკის საგანგებო და სრულუფლებიანი ელჩის პროფესორ ერმუჰამეტ ერტისბაევის საჯარო ლექცია.

თემაზე :  „დამოუკიდებელი ყაზახეთი, ისტორია და თანამედროვეობა“.

ლექციის მიზანია საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის სტუდენტებმა მიიღონ კვალიფიციური ინფორმაცია ყაზახეთის რესპუბლიკის ისტორიაზე, ეკონომიკასა და პოლიტიკურ სისტემაზე. ყაზახეთი,  არის  საქართველოსთვის მნიშვნელოვანი პოლიტიკური და ეკონომიკური პარტნიორი, რომელიც განუხრელად და პრინციპულად უჭერს მხარს საქართველოს ტერიტორიულ მთლიანობასა და პოლიტიკურ ორიენტაცას. საგულისხმოა,რომ ყაზახეთის რესპუბლიკას საქართველოში განხორციელებული აქვს მრავალ მილიონიანი ინვესტიციები.  დღესაც საქართველო ერთადერთი  ქვეყანაა, სადაც ყაზახეთი, მიუხედავად მსოფლიოში არსებული კრიზისებისა, ახალ სერიოზულ ინვესტიციებს გეგმავს.

აღნიშნული ღონისძიება გაიმართება, სტუ-ს სამართლისა და საერთაშორისო ურთიერთობების ფაკულტეტსა და ყაზახეთის საელჩოს საკონსულო დეპარტამენტს შორის  დადებული   მემორანდუმის ეგიდით, რომელსაც დაესწრებიან  სტუ-ს სამართლისა და საერთაშორისო ურთიერთობების ფაკულტეტის სტუდენტები,  პროფესორ-მასწავლებლები და სხვა მიწვეული სტუმრები.

18 ივნისს თბილისში, ქართულ-რუსულ საინფორმაციო ცენტრში გაიმართა მრგვალი მაგიდა თემაზე „ახლო აღმოსავლეთის კონფლიქტები — კრიზისი სირიაში”. ღონისძიებაში მონაწილეობდნენ საქართველოს ტექნიკური უნივერსიტეტის,  სამართლისა და საერათაშორისო ურთიერთობების ფაკულტეტის,საერთაშორისო ურთიერთობების რუსულ ენოვანი პროგრამის ხელმძღვანელი, ასოცირებული პროფესორი ნონა ლომიძე, ასისტენტ პროფესორი ემილია ალავერდოვი,  და ამავე პროგრამის მე–4 კურსის სტუდენტები: რიჩარდ გოიჩევსი, არტურ ლუკავა, დავიდ ბაბაევი, ნინა ფოფხაძე და მანანა ფიფია.  აგრეთვე შეხვედრას ესწრებოდნენ ექსპერტები და საქართველოს სხვადასხვა უმაღლესი სასწავლებლის საერთაშორისო ურთიერთობების ფაკულტეტების სტუდენტები.

შეხვედრაზე განიხილეს რელიგიური კონფლიქტები თანამედროვე სამყაროში, ინტერესთა კონფლიქტი სირიაში, “ისლამური სახელმწიფოს” არსი, საერთაშორისო სამართლის დარღვევის პრეცედენტები და სხვა საკითხები. მრგვალი მაგიდის მუშაობაში მონაწილეობდნენ ახალგაზრდა სპეციალისტები, რომლებმაც სირიის კონფლიქტის მოგვარების საკუთარი ხედვა წარმოადგინეს. შეხვედრა ოთხ საათზე მეტხანს გაგრძელდა. დასასრულს ორგანიზატორებმა მრგვალი მაგიდის მონაწილეებს სერტიფიკატები გადასცეს.

საქართველოს ტექნიკურ უნივერსიტეტში სამართლისა და საერთაშორისო ურთიერთობების ფაკულტეტის სტუდენტებმა წარმოადგინეს პრეზენტაცია  მსოფლიო პროცესების ალტერნატიულ რეალობაზე, კერძოდ: რა მოხდებოდა რომ არ დადებულიყო გეორგიევსკის ტრაქტატი და როგორი იქნებოდა სამყარო მეორე მსოფლიო ომში გერმანიას რომ გაემარჯვა.

აღნიშნული პრეზენტაცია ორგანიზებული იყო სამართლისა და საერთაშორისო ურთიერთობების ფაკულტეტის მოწვეული სპეციალისტის თორნიკე გვენეტაძის მიერ.

პრეზენტაციის მიზანი იყო იმ კითხვებზე პასუხის გაცემა, რომელიც   დღემდე არსებობს. რა პროცესები უძღოდა გეორგიევსკის ტრაქტატის დადებას? რა მოლოდინი ჰქონდა ქართველ ერს,  საქართველოს საგარეო-პოლიტიკური მდგომარეობიდან გამომდინარე იყო თუ არა გეორგიევსკის ტრაქტატი არჩევანი ცუდსა და უარესს შორის. სტუდენტებმა გამოთქვეს თავიანთი მოსაზრებები და მოიყვანეს მსოფლიო ისტორიიდან კონკრეტული ფაქტები, რომლებმაც  მათი აზრით გავლენა იქონია გეორგიევსკის ტრაქტატის დადებაზე.

აგრეთვე წარმოადგინეს ალტერნატიული რეალობა , თუ “ როგორი იქნებოდა სამყარო მეორე მსოფლიო ომში გერმანიას რომ გაემარჯვა“. განიხილეს უშუალოდ ის პროცესები, რომელიც წინ უძღოდა მეორე მსოფლიო ომს, შეაფასეს  იმის ალბათობა თუ რა მოხდებოდა გერმანიას რომ  გაემარჯვა. ძალზე საინტერესო აღმოჩნდა მათი ხედვა, ჩვენი ქვეყნის მომავალთან დაკავშირებით. და ბოლოს შემოგვთავაზეს  ისტორიულად  მოვლენების შესაძლო განვითარების ასპექტები.

საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის სტუდენტებმა გურამ მაღულარიამ, სანათა ჩანგელიამ და  თინათინ დადუნაშვილმა გაიმარჯვეს შეჯიბრში „იურიდიული დოკუმენტაციის შედგენა“, რომელიც ორგანიზებული იყო ილიას სახელმწიფო უნივერსიტეტის სამართლის კლინიკის მიერ.
შეჯიბრში მონაწილეობდა  საქართველოში აკრედიტირებული უმაღლესი სასწავლებლების სამი სტუდენტისგან  დაკომპლექტებული ჯგუფები. თითოეულმა ჯგუფმა გაიარა გასაუბრება და საბოლოოდ  მონაწილეობისათვის შეირჩა ოცი ჯგუფი. შეჯიბრის დაწყებამდე მათ ჩაუტარდათ ტრენინგი იურიდიული დოკუმენტების შედგენაში.

შეჯიბრი შედგებოდა სამი ეტაპისაგან. ნახევარ ფინალში გავიდნენ თავისუფალი უნივერსიტეტის, საქართველოს ტექნიკური უნივერსიტეტის და ილიას სახელმწიფო უნივერსიტეტის გუნდები.

შეჯიბრში გაიმარჯვა საქართველოს ტექნიკური უნივერსიტეტის  სამართლისა და საერთაშორისო ურთიერთობების  ფაკულტეტის სტუდენტთა გუნდმა, მათ გადაეცათ სერტიფიკატები და წიგნის სახლის ლიგამუსის ვაუჩერები.

სტუ-ს სამართლისა და საერთაშორისო ურთიერთობების ფაკულტეტის დეკანი პროფესორი ირაკლი გაბისონია ულოცავს ამ გამარჯვებას სამართლის დეპარატამენტის სტუდენტებს: გურამ მაღულარიას, თინათინ დადუნაშვილს და სანათა ჩანგელიას.  იგი მიესალმება ჩვენი  სტუდენტების მსგავს აქტიურობას და მოუწოდებს ყველას ჩაერთონ საქართველოს ტექნიკური  და სხვა უნივერსიტეტების მიერ  ორგანიზებულ პროექტებში, შეჯიბრებებში და მსგავს ღონისძიებებში, რათა გამოავლინონ საკუთარი ცოდნა და მოიპოვონ გამარჯვება.

2017 წლის 16 ივნისს  სტუდენტთა 85-ე ღია საერთაშორისო სამეცნიერო კონფერენცის სამართლის სექციაზე მოხსენებებით გამოვიდნენ სტუ-ს სამართლისა და საერთაშორისო ურთიერთობების ფაკულტეტის სამართლის დეპარატემენტის ბაკალავრიატის და მაგისტრატურის სტუდენტები.

სამართალმცოდნეობის ბაკალავრიატის მეორე კურსის სტუდენტმა ანა ტაკაშვილმა გააკეთა მოხსენება თემაზე: “ცალმხრივი გარიგების და ცალმხრივი ხელშეკრულების სამართლებრივი გამიჯვნა“, რომლის ხელმძღვანელი  სტუ-ს პროფესორი მზია დუნდუა. ხოლო, ბაკალავრიატის მესამე კურსის სტუდენტმა ანამარია ბაგალიშვილმა ისაუბრა თემაზე: „კანონიერი ქურდი, კანონიერი ქურდობა“, ხელმძღვანელისამართლი დოქტორი თემურ დარსანია.

ბაკალავრიატის პირველ კურსელმა ლაშა ძაგანიშვილმა, რომელსაც დამთავრებული აქვს კრიმინალისტიკის პროფესიული კურსი გააშუქა თავის გამოსვლაში“ პრობლემები თანამედროვე კრიმინალისტიკაში“. ხელმძღვანელი სტუ-ს ასოცირებული პროფესორი ლევან ქობულაშვილი.

ბაკალავრიატის მეორე კურსის სტუდენტებმა  ნანა გოგიამ და  ლოლიტა კაროუკინამ წარმოადგინეს მოხსენებები „ჰუმანიტარულ ინტერვენცია“-ზე და „შეურაცხაობა-ბრალის გამომრიცხველი გარემოება“-ზე. ხელმძღვანელი   პროფესორი ჯემალ გაბელია.

სამართლის მაგისტრატურის პირველი კურსის სტუდენტმა თამარ ბარამიამ წარმოადგინა თემა “საქართველოს კონსტიტუციის 94-ე მუხლის მიზანშეწონილობის ასპექტები“,  ხელმძღვანელი  სამართლისა და საერთაშორისო ურთიერთობების ფაკულტეტის დეკანი პროფესორი ირაკლი გაბისონია.

მომხსენებლებს, ჟიურის წევრებსა და დამსწრე საზოგადოებას შორის გაიმართა დისკუსია თითოეულ წარმოდგენილ მოხსენებაზე.

სამართლის სექციას ხელმძღვანელობდა შესაბამისი ჟიური, რომელთა ინდივიდუალური შეფასებების თანახმად გამოვლინდა გამარჯვებულები, რომლებსაც გადაეცათ I , II, III, საპრიზო ადგილები.

სტუ-ს სამართლისა და საერთაშორისო ურთიერთობების ფაკულტეტის დეკანი პროფესორი ირაკლი გაბისონია მადლობას უხდის სტუდენტებს 85-ე ღია საერთაშორისო სამეცნიერო კონფერენციაში მონაწილეობისათვის, გამოთქვა კმაყოფილება ერთობ პრობლემატური და საინტერესო მოხსენებების წარმოდგენისთვის. მიულოცა საპრიზო ადგილის მფლობელებს და სამომავლოდ უსურვა წარმატებები თითოეულ მონაწილეებს ფაკულტეტის მიერ დაგეგმილ სხვა კონფერენციებში და ღონისძიებებში.