1 დეკემბერს საქართველოს ტექნიკური უნივერისტეტის სამართლისა და საერთაშორისო ფაკულტეტს  ჩინური კვლევითი ცენტრის ორგანიზებით ეწვია ჩინეთის სიახლეების სააგენტოს მთავარი კორესპონდენტი ლი მინგი.  იგი დაესწრო ფაკულტეტზე არჩევითი საგნის ჩინურის სწავლების გაკვეთილებს, გაესაუბრა სტუდენტებს და გააცნო ხინუას სიახლეების სააგენტოს მუშაობის სპეციფიკა. სტუმარი ლი მინგი შეხვდა ფაკულტეტის დეკანს პროფესორ ირაკლი გაბისონიას. დეკანმა მიაწოდა ინფორმაცია ფაკულტეტზე ჩინურის სწავლებასთან დაკავშირებით, ასევე გააცნო ჩინეთის კვლევითი ინსტიტუტის საქმიანობის სახეები და სამომავლო გეგმები.

შეხვედრას ასევე ესწრებოდა ჩინური კვლევითი ცენტრის დირექტორი პროფესორი ავთანდილ კიკნაძე და  ჩინური ენის მასწავლებლები.

2017 წლის 27-2 ნოემბერს სტუ-ს სამართლისა და საერთაშორისო ურთიერთობების ფაკულტეტის სტუდენტებისთვის ტარდება პირველი  შუალედური გამოცდები, აღნიშნული პროცესი მეტად გამჭვირვალე, ობიექტური და სამართლიანია.

სტუ-ს სამართლისა და საერთაშორისო ურთიერთობების ფაკულტეტის დეკანის ირაკლი გაბისონიას გადაწყვეტილებით მაქსიმალურად ობიექტურად ტარდება  გამოცდები, ამავე დროს, სრულიად არის დაცული ყველა სტუდენტის უფლება.

მნიშვნელოვანია, რომ  სტუდენტმა შეძლოს მშვიდ გარემოში, თანაბარ პირობებში დაწეროს საგამოცდო საკითხები.

სამართლისა და საერთაშორისო ურთიერთობების ფაკულტეტის სტუდენტებს საკუთარი საგამოცდო ცხრილის ნახვა შეუძლიათ www. Law.gtu.ge-ზე.

სტუ-ს სამართლისა და საერთაშორისო ურთიერთობების ფაკულტეტის დეკანის ირაკლი გაბისონიას და ფაკულტეტის აკადემიური საბჭოს მიერ ფაკულტეტზე დამტკიცებულია გამოცდის მსვლელობისას სტუდენტთა ქცევის წესები:

1. სტუდენტი ვალდებულია ცხრილში მითითებული განრიგის მიხედვით, გამოცხადდეს საგამოცდო ოთახში. დაგვიანების შემთხვევაში სტუდენტი გამოცდაზე არ დაიშვება. სტუდენტის დაგვიანების ფაქტი ფიქსირდება სტუდენტის მიერ საგამოცდო წესების დარღვევის უწყისში;
2. სტუდენტი ვალდებულია, იქონიოს პირადობის დამადასტურებელი მოწმობა ან /და სტუდენტის ბარათი, წინააღმდეგ შემთხვევაში, სტუდენტი გამოცდაზე არ დაიშვება;
3. აკრძალულია გამოცდაზე ნებისმიერი ნივთის შეტანა, გარდა საწერი კალმის, სასმელი წყლისა და ჯანმრთელობისათვის აუცილებელი ნივთებისა;
4. წერის დაწყებამდე სამუშაო მაგიდაზე რაიმე სხვა ფურცლის აღმოჩენის შემთხვევაში სტუდენტი მიიღებს გაფრთხილებას, გამოცდის დაწყების შემდეგ ნებისმიერი სხვა დარღვევის შემთხვევაში მოიხსნება გამოცდიდან, გადალაპარაკებისა და გადაწერის მცდელობის დაფიქსირებისთანავე სტუდენტი მოიხსნება გამოცდიდან;
5. საგამოცდო დროის ათვლის დაწყების შემდეგ აკრძალულია აუდიტორიიდან გასვლა წერის სრულად დამთავრებამდე;
6. საგამოცდო წესების დამრღვევი სტუდნეტისათვის გამოცხადებული თითოეული ზეპირი გაფრთხილება ფორმდება საგამოცდო წესების დარღვევის შესაბამის უწყისში, ხოლო სტუდენტის გამოცდიდან მოხსნა ფორმდება შესაბამისი ოქმით.

მნიშვნელოვანია, რომ ყველა სტუდენტს აქვს შესაძლებლობა გამოთქვას პრეტენზია,  საგამოცდო საკითხების და გამოცდის მსვლელობის მიმართ, მსგავსი შემთხვევის დაფიქსირების შემთხვევაში, სტუდენტის საჩივარს განიხილავს შესაბამისი საგამოცდო კომისია და გამოიტანს გადაწყვეტილებას, დაკმაყოფილების შემთხვევაში კი სტუდენტს მიეცემა შესაძლობლობა დამატებით დაწეროს გამოცდა.

სტუ-ს სამართლისა და საერთაშორისო ურთიერთობების ფაკულტეტის დეკანის ირაკლი გაბისონიას დამოკიდებულება მკაფიო და ცალსახაა. დაცული უნდა იყოს როგორც სტუდენტების, ასევე ლექტორების უფლებები. აუცილებელია ყველა სტუდენტი იმყოფებოდეს თანაბარ და სამართლიან გარემოში.ასევე, ლექტორის შეფასება პირდაპირპროპორციული უნდა იყოს სტუდენტის ნაშრომისა.

საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ბაკალავრიატის მესამე კურსის სტუდენტმა ანა ტაკაშვილმა და პირველი კურსის სტუდენტმა მერაბი ტაკაშვილმა სტეპის მიერ ორგანიზებულ პროექტში საქართველოს ტექნიკური უნივერსიტეტის სახელით წარმოადგინეს პრეზენტაცია თემაზე:  რელიგიასა და მის გავლენაზე, კერძოდ იმაზე, არის თუ არა რელიგია თავისუფალი არჩევანი.

აღსანიშნავია, რომ პრეზენტაციის პროცესში აუდიტორიაც აქტიურად იყო ჩართული. სპიკერებმა ისაუბრეს რელიგიის განვითარების ეტაპებზე და იმ ფაქტორებზე, რომლებიც რელიგიის თავისუფლებაზე ახდენს ზეგავლენას.
გუნდმა კონკრეტული მაგალითებით აჩვენა სხვადასხვა რელიგიების მიმართება ერთ კონკრეტულ სოციუმში. პრეზენტაციის პროცესში დაისვა საინტერესო კითხვები სხვა გუნდების წარმომადგენლების მხრიდან. სპიკერები ჟიურიმ მაღალი ქულებით, დადებითად შეაფასა და ჩვენმა სტუდენტებმა პირველი ადგილი მოიპოვეს.

სტუდენტები დაფინანსდნენ სამართლისა და საერთაშორისო ურთიერთობების ფაკულტეტის ბიუჯეტიდან.

2017 წლის 14-22 ნოემბერს, საქართველოს ტექნიკური უნივერისტეტის, სამართლისა და საერთაშორისო ურთიერთობების ფაკულტეტის ასისტენტ პროფესორმა, ემილია ალავერდოვამ გაიმარჯვა Erasmus + -ის პროექტში და გაემგზავრა კვიპროსზე, როგორც საქართველოს წარმომადგენელი და ერთადერთი გამარჯვებული. პროექტი სახელწოდებით ”Rainbow Spectactor“ ეძღვნებოდა ყველა სახის კონფლიქტს: საერთაშორისო, რელიგიურ, კორპორაციულ, პიროვნულ და ა.შ. აგრეთვე განიხილებოდა ეროვნული, რელიგიური და სექსუალური უმცირესობების უფლებების დაცვა კონფლიქტურ და არაკონფლიქტურ სიტუაციებში და ყოველდღიურ ცხოვრებაში. კურსის მიზანი იყო კონფლიქტის მართვა და მენეჯმენტი და ადამიანის უფლებების დაცვა. ორგანიზატორებს პროექტი საკმაოდ წარმატებულად მიაჩნიათ და იგეგმება პროექტის 2 ნაწილის ჩატარება, სადაც ასისტენტ-პროფესორი ემილია ალავერდოვი იქნება მიწვეული ექსპერტად.

ასევე, აღსანიშნავია რომ ემილია ალავერდოვი აირჩიეს  აშშ -ჩინეთისა (ISSN1539-8080)  და სინო-ამერიკული (ISSN158072)  ინგლისური ენის სასწავლო საგამომცემლო სახლის (David Publishing Company), USA, NY რეფერენტად.

სამართლისა და საერთაშორისო ურთიერთობების ფაკულტეტი ულოცავს ემილია ალავერდოვას გამარჯვებას და უსურვებს  შემდგომ წარმატებებს.

 საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის დეკანი ირაკლი გაბისონია, პროფესორები: ვახტანგ ჟვანია და მალხაზ ჩიტაია ესპანეთში-ბარსელონას ავტონომიურ უნივერსიტეტში სამუშაო ვიზიტით იმყოფებიან. აღნიშნული ვიზიტი მიზნად ისახავს საქართველოს ტექნიკურ უნივერსიტეტსა და Universitat Autònoma de Barcelona-ს შორის ურთიერთთანამშრომლობის გაღრმავებას, სამომავლოდ კი მემორანდუმის გაფორმებას, რომლის ფარგლებშიც სამართლისა საერთაშორისო ურთიერთობების ფაკულტეტის სტუდენტებს და აკადემიურ პერსონალს მიეცემათ შესაძლებლობა ისარგებლონ გაცვლითი პროგრამებით, მიიღონ მონაწილეობა ერთობლივად ორგანიზებულ სასწავლო-სამეცნიერო ხასიათის ღონისძიებებში, მათ შორის, საერთაშორისო კონფერენციებში, ტრეინინგებში და სხვა აქტივობებში. პროფესორი ირაკლი გაბისონია შეხვდა აღნიშნული უნივერსიტეტის წარმომადგენლებს და აკადემიურ პერსონალს.

სამართლისა და საერთაშორისო ურთიერთობის ფაკულტეტის წარმომადგენლებმა მონაწილეობა მიიღეს საერთაშორისო სამეცნიერო კონფერენციაში თემაზე: „No Justice Without Life“. კონფერენციაზე მთავარი მომხსენებელი იყო ბილი მური. უდანაშაულოდ სიკვდილმისჯილი, საზოგადო მოღვაწე, რომელმაც შექმნა საზოგადოებრივი მოძრაობა სამართლიანი სასამართლოს შესახებ. ფაკულტეტის დეკანის მოწვევით საქართველოს ტექნიკურ უნივერისტეტს ახლო მომავალში ეწვევიან Universitat Autònoma de Barcelona-ს პროფესორები.

სამართლისა და საერთაშორისო ურთიერთობების ფაკულტეტის დეკანი, პროფესორი ირაკლი გაბისონია და აკადემიური პერსონალი ულოცავს ჩვენს პროფესორ-ასისტენს ქეთევან ცინცაძეს, იუსტიციის უმაღლესი საბჭოს დამოუკიდებელი ინსპექტორის თანამდებობის დაკავებას.

ჩვენთვის სასიხარულოა ის ფაქტი, რომ  ქეთევან ცინცაძე 2005-2009 წლებში სახელმწიფოს სრული დაფინანსებით (გრანტით) სწავლობდა საქართველოს ტექნიკურ უნივერსიტეტში, უნივერსიტეტი დაამთავრა წარჩინებით და მიენიჭა ბაკალავრის აკადემიური ხარისხი სამართალმცოდნეობის სპეციალობით;ასევე, 2009-2011 წლებში სწავლობდა საქართველოს ტექნიკურ უნივერსიტეტში, უნივერსიტეტი დაამთავრა წარჩინებით და მიენიჭა სამართლის მაგისტრის აკადემიური ხარისხი;

აღსანიშნავია, რომ მას  2017 წლის სექტემბრიდან – ღია კონკურსის საფუძველზე 4 წლის ვადით საქართველოს ტექნიკური უნივერსიტეტის სამართლისა და საერთაშორისო ურთიერთობის ფაკულტეტზე უკავია პროფესორ-ასისტენტის აკადემიური თანამდებობა

2017 წლის 22 ნოემბერს სტუ-ს სამართლისა და საერთაშორისო ურთიერთობების ფაკულტეტის სტუდენტებს შეხვდა და საჯარო ლექცია წაუკითხა ისტორიის დოქტორმა, მოწვეულმა პროფესორმა,  ყოფილი საქართველოს პარლამენტის წევრმა ნესტან კირთაძემ.

საჯარო ლექცია გახსნა და სტუმარი წარუდგინა სტუდენტებს სტუ-ს სამართლისა და საერთაშორისო ურთიერთობების ფაკულტეტის დეკანმა პროფესორ ირაკლი გაბისონია, მან მიულოცა სტუდენტებს ქალბატონი ნესტან კირთაძის საჯარო ლექციაზე დასწრების შესაძლებლობა და აღნიშნა, რომ ფაკულტეტი კვლავ აქტიურად გააგრძელებს სტუდენტების მოთხოვნისამებრ მათთვის სასურველი პროფესორების მოწვევას. დამსწრე საზოგადოებას ასევე მიესალმა პოლიტიკისა და საერთაშორისო ურთიერთობების დეპარტამენტის ხელმძღვანელი პროფესორი იგორ კვესელავა.

სტუმარმა აუდიტორიის წინაშე წარმოადგინა თემა: საქართველოს დამოუკიდებლობა და საერთაშორისო ურთიერთობები“. საჯარო ლექციას ესწრებოდნენ როგორც სამართლის ასევე საერთაშორისო ურთიერთობების სპეციალობის სტუდენტები. მცირე დროის მიუხედავად პროფესორმა დააინტერესა სტუდენტები, მათი ყურადღებაა გაამახვილა ძალზედ მნიშვნელოვან ფაქტებზე, უამბო მათ ის, რასაც სახელმძღვანელოებში ვერ ამოიკითხავენ. საქართველოს ისტორიის ცოცხალი მაგალითების მოსმენამ კი სტუდენტებში უაღრესად დადებითი ემოციები გამოიწვია.

შეხვედრა ემოციურად და საინტერესოდ წარიმართა, სტუდენტები აქტიურად უსვამდნენ შეკითხვებს და შეხვედრის დასასრულს მადლობა გადაუხადეს პროფესორ ნესტან კირთაძეს ასეთი შთამბეჭდავი საჯარო ლექციის ჩატარებისთვის და გამოთქვეს იმედი, რომ მომავალშიც ექნებათ შესაძლებლობა მოუსმინონ მას.

სამართლისა და საერთაშორისო ურთიერთობების ფაკულტეტის დეკანი ირაკლი გაბისონია და აკადემიური პერსონალი მადლობას უხდის პროფესორ ნესტან კირთაძეს უაღრესად საინტერესო საჯარო ლექციის ჩატარებისთვის.

21 ნოემბერს სამართლისა და საერთაშორისო ურთიერთობების ფაკულტეტის სამართლის კლინიკის ორგანიზებით ჩატარდა პირველი შეხვედრა სისხლის სამართლის იმიტირებული სასამართლო პროცესისათვის მოსამზადებელ სასწავლო კურსზე.

კურსის ფარგლებში ჩატარდება 10 შეხვედრა, სადაც სტუდენტები დაეუფლებიან სასამართლოში იურისტის გამოსვლის ტექნიკას, სამართლებრივი წერის უნარ-ჩვევებს, ხოლო დასასრულს  მონაწილე სტუდენტების მონაწილეობით 2017 წლის დეკემბერში გაიმართება იმიტირებული სასამართლო პროცესი. პროექტში მონაწილეობას იღებენ სამართლისა და საერთაშორისო ურთიერთობების ფაკულტეტის გასაუბრებით შერჩეული სტუდენტები. მოსამზადებელი კურსის სალექციო ნაწილს გაუძღვება საქართველოს ახალგაზრდა იურისტთა  ასოციაციის სისხლის სამართლის ადვოკატი ლევან ვეფხვაძე.

2017 წლის 20 ნოემბერს სტუ-ს სამართლისა და საერთაშორისო ურთიერთობების ფაკულტეტის საბჭოს სხდომაზე დეკანის ირაკლი გაბისონიას ინიციატივით განიხილეს საკითხი ფაკულტეტზე „სამშვიდობო განათლების ცენტრი“-ს შექმნის შესახებ.

ფაკულტეტის საბჭოს წევრებმა ერთხმად დაუჭირეს მხარი ფაკულტეტზე შეიქმნას ახალი სამეცნიერო-კვლევითი სტრუქტურული ერთეული, რომელიც იმოქმედებს თვითდაფინანსების პრინციპით.

ცენტრის მიზნებია: საქართველოში სამშვიდობო განათლების ხელშეწყობა, სამშვიდობო სფეროში სამეცნიერო-კვლევითი საქმიანობა და საზოგადოებაში სამშვიდობო ფასეულობათა დანერგვა, ამ მიზნების მისაღწევად საქმიანობის ძირითადი მიმართულებებია სამშვიდობო ბიბლიოთეკისა და მუზეუმის შექმნა, სამშიდობო აქტივიზმის პოპულარიზაცია, სამეცნიერო-კვლევითი საქმიანობის წახალისება და ხელშეწყობა, სამშვიდობო განათლების სასწავლო პროგრამების შემუშავება, სამეცნიერო ლიტერატურის თარგმნა, მოძიება და სხვა.