სამეცნიერო პროექტის ფარგლებში შესრულებული სამუშაოს განხილვა.

სამართლისა და საერთაშორისო ურთიერთობების ფაკულტეტის სათათბირო სხდომაზე პროფესორ მაია ყიფიანმა სამეცნიერო პროექტის „ოჯახში ძალადობის პრობლემები საქართველოში“ განხორციელებული საქმიანობის პრეზენტაცია ჩაატარა. განხილვა ღია იყო ყველა დაინტერესებული პირისთვის.
პრეზენტაციის დასაწყისში პროფესორმა წარმოადგინა უკვე შესრულებული სამუშაოს სრული ანალიზი, წარმოუდგინა დამსწრე საზოგადოებას წერილობითი სამეცნიერო კვლევის შედეგი, ასევე, მიაწოდა სრულყოფილი ინფორმაცია სამომავლო გეგმების შესახებ. როგორც პრეზენტაციის შედეგად დადგინდა თემაზე მომუშავე სამეცნიერო ჯგუფის მიერ შესრულებულია დასახული მიზნის 75 %-ი. აღნიშნული პროექტი 2018 წლის აპრილის თვეში მიიღებს დასრულებულ სახეს, რის შედეგადაც ფაკულტეტის მხარდაჭერით გამოიცემა სამეცნიერო კვლევებზე დაფუძნებული სახელმძღვანელო, რომელშიც ჩამოყალიბებული იქნება რეკომენდაციები, პრობლემის გადაჭრის გზები და სამომავლოდ განსახორციელებელი ქმედებების ანალიზი. გაანალიზდება მსოფლიოს სხვადასხვა ქვეყნის პრაქტიკა, შეისწავლიან სტატისტიკას, ძალადობის ხასიათს, კრიტერიუმებს, მაპროვოცირებელ და სხვა ნიშნებს.
პროფესორ მაია ყიფიანის პრეზენტაციის შემდგომ სამეცნიერო დისკუსი გაიმართა სათათბიროს წევრებს შორის. ფაკულტეტის დეკანმა პროფესორ ირაკლი გაბისონიამ კრიტიკული მსჯელობა წამოაყენა როგორც პროექტის, ასევე ნაშრომის მიმართ. მისი შეხედულებით, ვინაიდან, ფაკულტეტის პრიორიტეტს წარმოადგენს სამეცნიერო კვლევითი საქმიანობის უმაღლეს დონეზე განხორციელება, სამუშაო ჯგუფის მიერ შესრულებულმა ნაშრომმა უნდა იქონიოს სამეცნიერო, მაღალი ხარისხი. სისხლის სამართლის აკადემიური დეპარტამენტის ხელმძღვანელმა პროფესორ ჯემალ ჯანაშიამ რამდენიმე რეკომენდაცია მისცა სამუშაო ჯგუფის წევრებს, რათა მათ მიერ შესრულებულმა კვლევამ უფრო სრულყოფილი, ამომწურავი და სამართლის ჩარჩოებში მოქცეული სახე მიიღოს. პროექტის წევრებმა გაიზიარეს ყველა წამოყენებული შენიშვნა, მოსაზრება და რჩევები, მათ გამოთქვეს სურვილი პროექტის ფარგლებში უფრო მეტი კვლევის განხორციელების.
შეხვედრის დასასრულს, დამსწრე საზოგადოებამ ერთხმად დაუჭირა მხარი პროექტის განხორციელებას, აღნიშნული თემატიკა დღევანდელ რეალობაში მეტად სენსიტიური და პრობლემურია, ამიტომაც სიღრმისეული კვლევის შედეგად ფაკულტეტი შეძლებს ისეთი ნაშრომი წარუდგინოს საზოგადოებას, რომელიც იქნება სახელმწიფო უწყებებისა და ცალკეული პირებისთვის მრავლისმომცემი. მადლობა გადაუხადეს სამუშაო ჯგუფის წევრებს უკვე შესრულებული საქმისთვის და იმედოვნეს, რომ მომავალი განხილვისთვის მეტად დაკონკრეტებულ, სრულყოფილ სახეს მიიღებს სამეცნიერო კვლევა.