გთავაზობთ საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ახალ რუბრიკას „გაიცანი სტუ-დენტი“, რომელიც საშუალებას მოგცემთ გაიცნოთ ჩვენი ფაკულტეტის სტუდენტები, რომლებიც გამორჩეულნი არიან მაღალი აკადემიური მოსწრებითა და საზოგადოებრივი საქმიანობით.
ამჟამად წარმოგიდგენთ გიგა ძირკველიშვილს, რომელიც სწავლობს სამართლისა და საერთაშორისო ურთიერთობების ფაკულტეტის სამართლის სპეციალობის მესამე კურსზე.
1. მოგესალმებით, გიგა, გააცანით თავი მკითხველს

მოგესალმებით, დავიბადე ქ. რუსთავში დიდ და ბედნიერ ოჯახში, მყავს 2 ძმა და 5 და. გავიზარდე რუსთავში და ამ ქალაქს უკავშირდება თითქმის ყველა ბავშვობის მოგონება. დავდიოდი ქ. რუსთავის კერძო სკოლა „რეცა“-ში, რომელმაც დიდი წვლილი შეიტანა, როგორც ჩემს განათლებაში ისე პიროვნებად ჩამოყალიბებაში.

2. რატომ გადაწყვიტეთ სტუ-ში ჩაბარება, თან სამართალზე?
პატარაობიდან მოყოლებული ყოველთვის მქონდა შეხება იურისტებთან და სხვანაირად შეუძლებელიც იყო, რადგან მამაჩემი და მისი ძმები პროფესიით იურისტები არიან. სწორედ ამ ფაქტორმა და დიდმა ინტერესმა ამ პროფესიის მიმართ გადამაწყვეტინა მეცადა ბედი სამართლის მიმართულებით. სტუ-ზე არჩევანის გაკეთება კი სტუ-ში არსებულმა სწავლების პროცესმა, მეგობრულმა გარემომ და ამასთანავე მამის რჩევამ განაპირობა.
3. რა განასხვავებს ამ ფაკულტეტს სხვა უნივერსიტეტის სასწავლო პროგრამიდან?
პირველ რიგში, გამოვყოფდი სწავლების ჯგუფურ მეთოდს, რომელიც სტუდენტებს აძლევს საშუალებას უკეთ მოუსმინონ ლექტორებს და უშუალო კონტაქტი იქონიონ, როგორც ლექტორებთან ასევე ჯგუფელებთან. მეორე რიგში, გამოვყოფდი სტუ-ს მაღალკვალიფიციურ ლექტორებს, რომლებიც ნებისმიერ დროს მზად არიან დაგეხმარონ. ასევე ინოვაციებს, რომლებსაც ფაკულტეტის ხელმძღვანელობა გვთავაზობს და რაც ყველაზე მთავარია სტუ სტუდენტებს უქმნის ყველა პირობას იმისათვის, რომ მათ სრულყონ საკუთარი უნარ-ჩვევები და განვითარდნენ პროფესიულად. უნდა აღინიშნოს, რომ ფაკულტეტის ხელმძღვანელობა ყოველთვის ახალ გამოწვევებს გვთავაზობს, დაუღალავად შრომობენ, რათა სტუ გახდეს უფრო მეტად კომფორტული და სასურველი სასწავლებელი, რომელიც მუდამ ღიაა ინოვაციებისთვის.

4. მოგვიყევით თქვენი სტუდენტური აქტივობის შესახებ?
ყოველთვის ვცდილობ ვიყო აქტიური სტუდენტი და მივიღო მონაწილეობა უნივერსიტეტის მიერ შემოთავაზებულ აქტივობებში.
2017 წლის ზაფხულში ვიყავი ზუგდიდის სამართლის სკოლაში, სადაც საშუალება მქონდა დავსწრებოდი გერმანელი ლექტორების სემინარებს. გამეგო მეტი მათი სამართლებრივი სტრუქტურისა და პრაქტიკის შესახებ, გამეცნო სხვა უნივერსიტეტის სტუდენტები და მეთანამშრომლა მათთან.
2017 წლის მარტში მივიღე მონაწილეობა სისხლის სამართლის საჯარო ლექციის ჩატარებაში, საკითხზე მართლწინააღმდეგობისა და ბრალის გამომრიცხველი გარემოებები.
გარდა ამისა, უამრავ ღონისძიებაში, ტრენინგებში, კონფერენციებში მიმიღია მონაწილეობა უნივერსიტეტის ფარგლებში და ფარგლებს გარეთაც, რომელთა ჩამოთვლაც შორს წაგვიყვანს.
5. სად ხედავთ თქვენს თავს მომავალში?
სამომავლოდ , ვგეგმავ იურისტობას ბიზნეს-სამართლის მიმართულებით ვიწრო ჭრილში, კერძოდ გაკოტრების სამართალი- გადახდისუუნარობა. ასევე, მინდა მქონდეს საადვოკატო ბიურო, მაღალკვალიფიციური ჯგუფით, რომელიც დიდ გამოწვევებს შეეჭიდება.
6. რას ურჩევთ სტუ-ს პირველკურსელებს ?
პირველ რიგში, გილოცავთ სტუდენტობას და ჩემი რჩევა იქნება გამოიყენონ ყველა ის შესაძლებლობა, რომელსაც სტუ სთავაზობთ. მიიღეთ ყველა საგანმანათლებლო პროექტში მონაწილეობა, იშრომეთ, რადგან შრომას ყოველთვის აქვს აზრი.

გთავაზობთ საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ახალ რუბრიკას „გაიცანი სტუ-დენტი“, რომელიც საშუალებას მოგცემთ გაიცნოთ ჩვენი ფაკულტეტის სტუდენტები, რომლებიც გამორჩეულნი არიან მაღალი აკადემიური მოსწრებითა და საზოგადოებრივი საქმიანობით.
ამჟამად წარმოგიდგენთ გვანცა რევაზიშვილს, რომელიც სწავლობს სამართლისა და საერთაშორისო ურთიერთობების ფაკულტეტის სამართლის სპეციალობის მესამე კურსზე
1. მოგესალმებით, გვანცა, გთხოვთ გაეცნოთ ჩვენს მკითხველს და გვიამბოთ ცოტა რამ თქვენს ბავშვობაზე ?
მოგესალმებით, მე გახლავართ გვანცა რევაზიშვილი, საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის მესამე კურსის სტუდენტი. რაც შეეხება ჩემს ბავშვობას, მოკლედ გეტყვით რომ ჩვეულებრივი ბავშვი ვიყავი, თუ არ ჩავთვლით იმას რომ, ბავშვისთვის ზედმეტად ადრეული ასაკიდანვე დასახული მაქვს მიზნები, რომელთა მისაღწევად ძალ-ღონეს არ დავიშურებ.
2. რატომ გადაწყვიტეთ სტუ-ში ჩაბარება, თან სამართალზე?
არ შემიძლია არ ავღნიშნო,თბილისის N24 საჯარო სკოლა, სადაც 12 წელი ვსწავლობდი, ამ სკოლამ მნიშვნელოვანი როლი ითამაშა ჩემი მომავალი პროფესიის არჩევაში, რადგან სკოლაში თეორიული სწავლების გარდა დიდ ყურადღებას უთმობდნენ სხვადასხვა სახის პროექტებსა თუ ღონისძიებებს. სწორედ სკოლის მიერ ორგანიზებულ ერთ-ერთ პროექტში მონაწილეობისას, რომელმაც დამაახლოვა იურისპრუდენციასთან, მივხვდი რომ სწავლის გაგრძელება უმაღლეს სასწავლებელში იურიდიული მიმართულებით მსურდა. დღევანდელი გადმოსახედიდან ვფიქრობ, რომ სწორი გადაწყვეტილება მივიღე. რაც შეეხება იმას თუ რატომ ჩავაბარე საქართველოს ტექნიკურ უნივერსიტეტში გეტყვით რომ თავიდანვე ვიცოდი რომ ვიქნებოდი სახელმწიფო უნივერსიტეტის სტუდენტი და უპირატესობა მხოლოდ 2 სახელმწიფო უნივერსიტეტს მივანიჭე და, რა თქმა უნდა, ერთ-ერთი მათგანი იყო საქართველოს ტექნიკური უნივერსიტეტი.
3. მოგვიყევით თქვენი სტუდენტური აქტივობის შესახებ?
მინდა გითხრათ, რომ საკმაოდ აქტიური სტუდენტური ცხოვრება მაქვს, რისთვისაც მადლობას ვუხდი საქართველოს ტექნიკურ უნივერსიტეტს, კერძოდ კი სამართლისა და საერთაშორისო ურთიერთობების ფაკულტეტის ადმინისტრაციას, რომ მაძლევს შანსს მივიღო მეტი ცოდნა და გამოცდილება. ვფიქრობ, თეორიული ცოდნის გარდა ძალიან მნიშვნელოვანია პრაქტიკული გამოცდილება, ამიტომ აქტიურად ვარ ჩაბმული ფაკულტეტის მიერ ორგანიზებულ არაერთ ღონისძიებებში, რომელთა უმეტესობაც პრაქტიკული ხასიათისაა. (იმიტირებული პროცესები, საჯარო ლექცია-სემინარები, დისკუსიები, სამეცნიერო კონფერენციები და სხვა)

4. გვითხარით, ისეთი თანამდებობა რომელზეც ოცნებობთ?
„ოცნების თანამდებობა“ ბავშვობიდან უცვლელია, მინდა გავხდე მოსამართლე და ამ ოცნებას აუცილებლად ვაქცევ რეალობად.
5. სად ხედავთ თქვენს თავს 5 წლის მერე?
5 წლის შემდეგ სამართლის როგორც ბაკალავრის ხარისხის ისე მაგისტრის ხარისხის დიპლომი მექნება. ბაკალავრიატის დამთავრების შემდეგ სწავლის გაგრძელებას მაგისტრატურის სასწავლო პროგრამაზე ვაპირებ, მომწონს აუდიტორიასთან თანამშრომლობა და არ გამოვრიცხავ ლექციების წაკითხვას მომავალში .
6. ცოტა რამ ფაკულტეტის ხელმძღვანელობაზეც მოგვიყევით.
ფაკულტეტის ხელმძღვანელობაზე გეტყვით, რომ ის თანამშრომლობს სტუდენტებთან, ისმენს მათ რჩევებს, წინადადებებს და გულისხმიერად ეკიდება მათ პრობლემებს. ფაკულტეტის ხელმძღვანელობამ იცის რომ უმთავრესი არიან სტუდენტები და სწორედ მათი ინტერესებიდან გამომდინარე მოქმედებენ. ალბათ, არ ვიქნები პირველი ვინც იტყვის რომ დეკანთან, დეკანის მოადგილესთან სტუდენტებს ძალიან უშუალო დამოკიდებულება აქვს, ასევე, დეპარტამენტის ხელმძღვანელ პირებთან. ეს კი ძალიან აადვილებს სტუდენტისთვის სტუდენტურ ცხოვრებას.
7. რას ურჩევთ სტუ-ს პირველკურსელებს ?
პირველ რიგში, მინდა მივულოცო პირველკურსელებს ცხოვრების ახალ ეტაპზე წარმატებით გადასვლა. მათ ვურჩევდი, რომ მაქსიმალურად გამოიყენონ სტუდენტური წლები, მიიღონ ყველა სირთულის გამოწვევა, რადგან სირთულეების გარეშე შეუძლებელია წარმატების მიღწევა. მინდა გითხრათ, გაგიმართლათ რომ ხართ სტუ-ს სტუდენტები, რადგან საშუალება გექნებათ ურთიერთობა გქონდეთ და მომავალი პროფესია შეგასწავლონ სტუ-ს კვალიფიციურმა ლექტორებმა. იყავით მოტივირებულები, მიზანდასახულნი და შრომა აუცილებლად დაგიფასდებათ!

8 ნოემბერს 16:00 საათზე, საჯარო სამართლის ლაბორატორიაში გაიმართება სამართლის დოქტორის, ასოცირებული პროფესორის თეიმურაზ დარსანიას წიგნის „სისხლისსამართლებრივი პასუხისმგებლობა დანაშაულის მცდელობისათვის" პრეზენტაცია-განხილვა.

დასწრება თავისუფალია!

გთავაზობთ საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ახალ რუბრიკას „გაიცანი სტუ-დენტი“, რაც საშუალებას მოგცემთ გაიცნოთ ჩვენი ფაკულტეტის სტუდენტები, რომლებიც გამორჩეულნი არიან მაღალი აკადემიური მოსწრებითა და საზოგადოებრივი საქმიანობით.
ამჟამად წარმოგიდგენთ თომა ხაბეიშვილს, რომელიც სწავლობს სამართლისა და საერთაშორისო ურთიერთობების ფაკულტეტის საერთაშორისო ურთიერთობების სპეციალობის მეოთხე კურსზე.
1. მოგესალმებით, თომა, გვიამბეთ თქვენს შესახებ?
მოგესალმებით, მე ვარ თომა ხაბეიშვილი, დავიბადე ქალაქ თბილისში, ვსწავლობდი 133-ე საჯარო სკოლაში, რომელიც დავამთავრე წარჩინებით. 2014 წელს ჩავაბარე საქართველოს ტექნიკურ უნივერსიტეტში.
2. რატომ გადაწყვიტეთ სტუ-ში ჩაბარება ?
პირველ რიგში, გადაწყვეტილება მივიღე, რადგან მინდოდა სახელმწიფო უმაღლეს სასწავლებელში მესწავლა. ასევე, ჩემი მეგობრები სწავლობდნენ აქ. ამიტომაც, საკმაოდ ბევრი ინფორმაცია მქონდა უნივერსიტეტის შესახებ და ეს სრულიად აზრიანი გადაწყვეტილება იყო ჩემის მხრიდან. აუცილებლად უნდა დავამატო, რომ დღესაც ზუსტად იგივე არჩევანს გავაკეთებდი.
3. როგორც ვიცით, ფაკულტეტის თვითმმართველობის თავმჯდომარე ხართ, გააცანით მკითხველს თქვენი თავი ამ კუთხით?
2015 წელს ბიზნეს-ინჟინერინგის ფაკულტეტის სტუდენტური გამგეობის მიერ დავინიშნე სტუდენტური თვითმმართველობის თავმჯდომარედ, როდესაც ფაკულტეტები გაიყო ხელახალი არჩევნების წესით დავინიშნე სამართლისა და საერთაშორისო ურთიერთობების ფაკულტეტის თვითმმართველობის თავმჯდომარედ. მსგავსი სახის ნდობის გამოცხადება ჩემთვის საამაყო და ამავე დროს მეტად საპასუხისმგებლოა. ვიცი, რომ ზოგიერთს არასტანდარტული დამოკიდებულება აქვს თვითმმართველობების მიმართ, მიაჩნიათ რომ ჩვენს მიერ არ კეთდება არაფერი სტუდენტების სასიკეთოდ, თუმცა, ვინც შეისწავლის ჩვენს საქმიანობას მიხვდება რომ არასწორი შეხედულება აქვთ. მე როგორც თვითმმართველობის თავმჯდომარე, სრულად ვაცნობიერებ ჩემს წილ პასუხისმგებლობას ფაკულტეტის განვითარების საქმეში, მერწმუნეთ, ამისთვის დაუღალავად ვშრომობთ თითოეული ჩვენგანი.
4. რა საქმიანობას ეწევა ფაკულტეტის თვითმმართველობა?
დავიწყოთ იქიდან რომ სტუდენტური თვითმმართველობის საქმიანობა არც თუ ისე მწირია და საკმაოდ ბევრ შრომას და ამავდროულად დროს მოითხოვს. პირველ რიგში, სტუდენტური თვითმმართველობის მიზანია სტუდენტს შეუქმნას აქტიური სტუდენტური ცხოვრება. აღნიშნულში იგულისხმება ის, რომ ისინი დატვირთულნი უნდა იყვნენ სპორტული, კულტურული და, რა თქმა უნდა, საგანმანათლებლო ღონისძიებებით. თითოეულმა სტუდენტმა უნდა წარმოაჩინოს თავისი თავი და შესაძლებლობების მაქსიმუმი, ამის საშუალებას კი სტუდენტური თვითმმართველობა ნამდვილად აძლევს.
მოდით ყველაზე მასშტაბურ პროექტზე ვისაუბროთ, რაც კი თვითმმართველობას განუხორციელებია. ეს გახლავთ, სტუ-ს სტუდენტური დღეები, რომელშიც ჩართული იყო ტექნიკური უნივერსიტეტის 10 000-მდე სტუდენტი. ღონისძიება შედგებოდა დაახლოებით 65-ი სახეობის შეჯიბრისგან. ჩვენი ფაკულტეტის სტუდენტური თვითმმართველობის ყველაზე დიდი მიღწევა, სწორედ სტუდენტური დღეების მოგებაა, რადგან მოგეხსენებათ ფაკულტეტი სულ რაღაც ერთი წლის შექმნილია. ჩვენმა გუნდმა შეძლო და მართლაც ყველას დაუმტკიცა ჩვენი შესაძლებლობები.
5. რა სახის პროექტებს სთავაზობთ სტუდენტებს?
პირველი მასშტაბური პროექტი, რაც სტუდენტებისთვის განხორციელდა ეს არის ექსკურსიები, რომელზედაც სტუდენტები აქტიურად ატარებენ მთელ დღეს საქართველოს სხვადასხვა კუთხეებში. მათ შესაძლებლობა აქვთ გაეცნონ სტუდენტური თვითმმართველობის საქმიანობას. ასევე, გაიცნონ ჩვენი ფაკულტეტის სტუდენტები და რაც ყველაზე მთავარია შეისწავლონ საქართველოს ღირსშესანიშნაობები. პროექტს აქვს ყოველკვირეული სახე და ფინანსდება ტექნიკური უნივერსიტეტის მხრიდან, რომელშიც თავისი წვლილი ასევე შეაქვს ფაკულტეტს. ექსკურსიაში მონაწილეობის მიღება შეუძლია ყველა საფეხურის სტუდენტს.
ჩვენს ასევე, ვახორციელებთ შემდეგი სახის კულტურულ და საგანმანათლებლო პროექტებს: რა? სად? როდის?, დებატები, ესეების კონკურსი, იმიტირებული პროცესები, საუკეთესო ორატორი, მხატრული კითხვა, პროფესიული გამოფენა, ფოტო კონკურსი, თანამედროვე ცეკვები, ხალხური სიმღერები და სხვა. რა თქმა უნდა, სპორტითაც აქტიურად ვართ დაკავებულები და ყველას ვთავაზობთ ფეხბურთის, კალათბურთის, ფრენბურთის, ბოულინგის, ბილიარდის, რაგბის, ჭადრაკის, ტენისის, კარტინგის, მკავჭიდის, მძლეოსნობის შეჯიბრებსა და სხვადასხვა ღონისძიებებს.
6. ვის შეუძლია თვითმმართველობის წევრობა და რა არის ამისთვის საჭირო?
სტუდენტური თვითმმართველობის წევრობა შეუძლია ჩვენი ფაკულტეტის ყველა საფეხურის სტუდენტს, რომელსაც უნდა წარმოაჩინოს თავი ამა თუ იმ სფეროში. ამისთვის საჭიროა შემოიტანოს განაცხადი, მოვიდეს გასაუბრებაზე და კანდიდატების ინტერესების შესაბამისად მოხდება მათი დაჯგუფება ჩვენს დეპარტამენტებში, რომელიც არსი შემდეგი სახის: სპორტის, პიარის, კულტურის, განათლების და სოციალურ საკითხთა. ვისარგებლებ შესაძლებლობით და აქვე დავაანონსებ, რომ 15 ნოემბერიდან ვიწყებთ ახალი წევრების მიღებას. ასევე, გაიმართება ღია კარის დღე. ვისურვებდი ბევრმა სტუდენტმა გამოთქვას სურვილი ჩვენს დიდ ოჯახში გაწევრიანების.
7. როგორ ახერხებთ სტუდენტური თვითმმართველობის თავმჯდომარეობა შეუთავსოთ თქვენი როგორც სტუდენტის ცხოვრებას?
უნდა ვაღიარო, ეს დიდ ძალისხმევას მოითხოვს ჩემგან. ერთის მხრივ, არის ჩემი პასუხისმგებლობა და მეორეს მხრივ მეც ჩვეულებრივი სტუდენტი ვარ. ვცდილობ, წარმატებული ვიყო, რამდენად გამომდის ამას დრო გვიჩვენებს.
8. სად ხედავთ თქვენს თავს მომავალში და გვითხარით, ისეთი თანამდებობა რომელზეც ოცნებობთ?
მომავალში ჩემს თავს ვხედავ პოლიტიკაში, რაც შეეხება ოცნების თანამდებობას, ნებისმიერ უმაღლეს პოლიტიკურ თანამდებობას შევიფერებდი (იცინის).
9. რას გვეტყვით ფაკულტეტის ხელმძღვანელობაზე?
პირველ რიგში, მინდა გითხრათ ჩვენი დეკანის შესახებ, ბატონი ირაკლი გაბისონია ფაკულტეტისთვის აკეთებს შესაძლებლობის მაქსიმუმს, იგი არ იშურებს ძალ-ღონეს ფაკულტეტის განვითარებისთვის, განუხრელად იცავს სტუდენტის უფლებებს და მათთან ამყარებს უშუალო ურთიერთობას, გამოირჩევა მეგობრული დამოკიდებულებით ყველას მიმართ. ფაკულტეტზე ასევე არსებობს სოციალურ საკითხთა, სპორტისა და კულტურის განყოფილება, რომელსაც ხელმძღვანელობს გიორგი კალანდაძე, მისი აქტიური ჩართულობით და თვითმმართველობასთან თანამშრომლობით უამრავი რამ კეთდება. კიდევ ერთხელ ვისარგებლებ ამ პლატფორმით და დეკანს ირაკლი გაბისონიას და გიორგი კალანდაძეს მადლობას ვეტყვი.
10. ფაკულტეტის მიერ ორგანიზებულ რომელ ღონისძიებას გამოყოფდით?
გარდა სტუდენტური დღეებისა გამოვყოფდი მეოთხე კურსელთა გამოსამშვიდობებელ საღამოს, რომელიც ზემოთჩამოთვლილი პირების დახმარებით და თვითმმართველობის ორგანიზებით განხორციელდა.
11. რის შეცვლას ისურვებდით უნივერსიტეტში?
ერთადერთი რაც არ მომწონს ეს არის ინტერიერი, უფრო ლამაზი გარემო მოუხდებოდა ჩვენს ფაკულტეტს.
12. რას ურჩევთ სტუ-ს პირველკურსელებს ?
პირველკურსელებს ვურჩევდი იმას, რომ არ გამოტოვონ არცერთი შესაძლებლობა, რომელსაც თვითმმართველობა სთავაზობს. იაქტიურონ, ჩაერთონ ყველაფერში და ჩვენც მაქსიმუმს გავაკეთებთ მათთვის.

გთავაზობთ საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ახალ რუბრიკას „გაიცანი სტუ-დენტი“, რაც საშუალებას მოგცემთ გაიცნოთ ჩვენი ფაკულტეტის სტუდენტები, რომლებიც გამორჩეულნი არიან მაღალი აკადემიური მოსწრებითა და საზოგადოებრივი საქმიანობით.
ამჟამად წარმოგიდგენთ ბაჩო კვირკველიას რომელიც სწავლობს სამართლისა და საერთაშორისო ურთიერთობების ფაკულტეტის სამართლის სპეციალობის მესამე კურსზე.
1. მოგვიყევით რამე თქვენი ბავშვობის შესახებ?
მოგესალმებით. დავიბადე და გავიზარდე ჩხოროწყუს რაიონში. ჩემი ბავშვობის წლები მთლიანად ამ ადგილთან არის დაკავშირებული. დავამთავრე ამავე რაიონის, აფხაზეთის #10 საჯარო სკოლა, სკოლაში სწავლის წლები საუკეთესო იყო ჩემს ცხოვრებაში, მყავდა შესანიშნავი პედაგოგები და ძალიან კარგი კლასელები, რომლებთანაც ბევრი ტკბილი მოგონება და ახლო მეგობრობა მაკავშირებს.
2. რატომ გადაწყვიტეთ სტუ–ში ჩაბარება? თან სამართალზე?
სამართალზე ჩაბარება ჩემი ბავშვობის ერთგვარი ოცნება იყო. გადაწყვეტილებაზე ზეგავლენა უმეტესწილად იქონია მამის პროფესიულმა ფაქტორმა, რომელიც ასევე სამართალმცოდნე გახლდათ. სწორედ ამის გამო ადრეული ასაკიდანვე გამიჩნდა ინტერესი ამ სფეროს მიმართ.
თავიდანვე მქონდა გარკვეული სახის წარმოდგენა სტუში მიმდინარე სასწავლო პროცესზე და აკადემიურ პერსონალზე, რამაც გარკვეული როლი ითამაშა არჩევანი შემეჩერებინა ამ უნივერსიტეტზე.
3.რა განასხვავებს ამ ფაკულტეტს სხვა უნივერსიტეტის სასწავლო პროგრამისგან?
ამ უნივერსიტეტს სხვა უნივერსიტეტის ფაკულტეტისგან განასხვავებს ინოვაციურობა, მუდმივი სიახლეები, ფაკულტეტი სტუდენტებს შესაძლებლობას აძლევს მაქსიმალურად განვითარდნენ პროფესიულად და ჩამოყალიბდნენ წარმატებულ იურისტებად.
4. მოგვიყევით თქვენი სტუდენტური აქტივობის შესახებ.?
2017 წლის მარტის თვეში ამავე უნივერსიტეტის სტუდენტთა ჯფუფი დეპარტამენტის დაფინანსებით და ხელშეწყობით გავემგზავრეთ ნიდერლანდების სახელმწიფოში, სადაც მონაწილეობა მივიღეთ ქალაქ უტრეხტში გამართულ გაეროს მოდელირებულ კონფერენციაში, ვიყავით ქალაქ ჰააგაში საერთაშორისო სისხლის სამართლის სასამართლოში (ICC) და მართლმსაჯულების საერთაშორისო სასამართლოში (ICTJ). ყოველივე ზემოთხსენებულმა არაჩვეულებრივი გამოცდილება შემძინა და ეს მოგზაურობა ჩემთვის ასევე გახდა ერთგვარი სტიმული იმისა, რომ რაც შეძლება მეტს მივაღწიო კარიერულად და მოვახერხო საკუთარი თავის მაქსიმალური რეალიზაცია.
5.სად ხედავთ თქვენს თავს მომავალში?
გადაწყვეტილი მაქვს სასწავლო პერიოდის დამთავრების შემდგომ კერძო სამართლის სფეროში დავკავდე საადვოკატო საქმიანობით. ამავდროულად მაქვს სურვილი სათანადო ხარისხის დაცვის შემდგომ შევუდგე საგანმანათლებლო საქმიანობას უმაღლეს სასწავლებლებში.
6.რომელია თანამდებობა რომელზეც ოცნებობთ?
როგორც ასეთი, კონკრეტულ თანამდებობაზე არ ვოცნებობ. არ მაქვს იმის განზრახვა რომ სამომავლოდ საჯარო სამსახურში დავკავდე, თუნდაც რაიმე სახის მაღალი თანამდებობით. მინდა ჩემი თავის რეალიზაცია კერძო სფეროში განვახორციელო როგორც წარმატებულმა ადვოკატმა და სამომავლოდ გამაჩნია სურვილი დავაფუძნო საკუთარი იურიდიული ფირმა.
7. ცოტა რამ ფაკულტეტის ხელმძღვანელობაზეც მოგვიყევით?.
საქართველოს ტექნიკური უნივერსიტეტის სამართლის და საერთაშორისო ურთიერთობების ფაკულტეტს ყავს გამორჩეული და პროფესიონალებით დაკომპლექტებული ხელმძღვანელობა და აკადემიური პერსონალი, რომლებიც მაქსიმალურად ცდილობენ სტუდენტების ხელშეწყობას. ფაკულტეტის დეკანის – ბატონი ირაკლი გაბისონიას ხელმძღვანელობით ფაკულტეტი დღითიდღე ვითარდება და მეტ შესაძლებლობებს აძლევს სტუდენტებს ჩამოყალიბდნენ როგორც პროფესიონალი კადრები. აუცილებლად უნდა აღინიშნოს, რომ ფაკულტეტის აკადემიური პერსონალი გამოირჩევა სტუდენტებთან მეგობრული დამოკიდებულებით და პროფესიონალური მიდგომით.
8. რა არის ის რაც არ მოგწონთ ფაკულტეტზე? რის შეცვლას ისურვებდით?
ფაკულტეტზე მიმდინარე ყოველი ცვლილება და ინოვაცია ჩემთვის პირადად მისაღები და მოსაწონია და როგორც ამ ფაკულტეტის სტუდენტი ამ ყველაფრით კმაყოფილი და ამაყი ვარ. დარწმუნებული ვარ იმაში რომ ფაკულტეტის წინსვლის პროცესი ასეთი მზარდი ტემპით გაგრძელდება.
9.რამ განაპირობა თქვენი წარმატებული სტუდენტობა?
უპირველესად ეს ოჯახის დამსახურებაა, რადგანაც ისინი მაქსიმალურად გვერდში მიდგანან. მეც პიროვნულად არ მაქვს იმის უფლება, რომ მათ იმედები გავუცრუო. ასევე ამ ყველაფერში დიდი წვლილი მიუძღვის ფაკულტეტის ხელმძღვანელობას, აკადემიურ პერსონალსა და ფაკულტეტის შიგნით არსებულ მეგობრულ გარემოს.
10. რას ურჩევთ სტუს პირველკურსელებს?
უპირველეს ყოვლისა, ყველა პირველკურსელს ვულოცავ ამ ფაკულტეტის სტუდენტობას და წარმატებებს ვუსურვებ მათ არჩეულ პროფესიაში.
მინდა იცოდნენ, რომ ეს არის ფაკულტეტი, სადაც მათი შრომა და მონდომება აუცილებლად დაფასებული იქნება.