საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ასისტენტ-პროფესორის გოგა მამფორიას ინიციატივით სამართლის სპეციალობის სტუდენტები საქართველოს პარლამენტის საკომიტეტო მუშაობას გაეცნენ. შემოქმედებითი ვიზიტი თბილისში საქართველოს პარლამენტის ძველ შენობაში განხორციელდა, როდესაც სტუდენტები უშუალოდ დაესწრნენ დიასპორისა და კავკასიის საკითხთა კომიტეტის სხდომას. მოისმინეს სხდომის მიმდინარეობა, აითვისეს პარლამენტის საქმიანობის სპეციფიკა, დაათვალიერეს საპარლამენტო სხდომის დარბაზი და მიიღეს პასუხები მათთვის სასურველ კითხვებზე.
მსგავსი შემოქმედებითი ვიზიტები სტუდენტების აქტიური ჩართულობით კვლავ გაგრძელდება სახელმწიფო უწყებებში, რათა ჩვენი ფაკულტეტის სტუდენტები უშუალოდ გაეცნენ მათთვის საინტერესო დაწესებულებების მუშაობას.

31 ოქტომბერს სტუ-ს ადმინისტრაციული კორპუსის ცენტრალურ ბიბლიოთეკაში გაიმართა გერმანელი პროფესორის თეო კობუშის საჯარო ლექცია თემაზე: სამართლებრივი სახელწიფო, როგორც სოციალური სახელმწიფო“ პროფესორი, დოქტორი თეო კობუში გახლავთ ანალიტიკური ფილოსოფიისა და რომაულ-კათოლიკური თეოლოგიის სპეციალისტი. იგი არის ემერიტუს პროფესორი ბონის ფრიდრიხ ვილჰემის უნივერსიტეტში, 2003 წლიდან ფილოსოფიის კათედრის გამგე . აგრეთვე, დირექტორი ბონის უნივერსიტეტში. დოქტორი კობუში „ფილოსოფიის ისტორიის ლექსიკონის“ თანარედაქტორია. იგი ასევე არის ფილოსოფიის გერმანულენოვან დოცენტთა კონსორციუმის თავმჯდომარე და ანტიკური ფილოსოფიის საზოგადოების საქმეთა დირექტორი.
აღნიშნული შეხვედრა გახსნა სტუ-ს სამართლისა და საერთაშორისო ურთიერთობების ფაკულტეტის დეკანმა პროფესორმა ირაკლი გაბისონიამ, რომელმაც მადლობა გადაუხადა სტუმარს მობრძანებისთვის, გააცნო დამსწრე საზოგადოებას იგი და ნაყოფიერი საჯარო ლექციის ჩატარება უსურვა. დეკანმა ასევე ყურადღება გაამახვილა ინტერდისციპლინარული პროგრამებით ფაკულტეტის ადმინისტრაციის დაინტერესებაზე, რისი დასტურიც დღევანდელი ღონისძიება გახლავთ.
პროფესორმა თეო კობუშმა ისაუბრა სოციალური სამართლებრივი სახელმწიფოს მნიშვნელობაზე, ცნებებსა და ზოგადად სახელმწიფოს სოციალურ ელემენტებზე. სახელმწიფოებრივი ერთიანობის პრინციპზე დაყრდნობით მიმოიხილა თანამედროვე სოციალური სახელმწიფოები, რომელიც განსაზღვრული იყო ჰეგელის თეორიებითა და შეხედულებებით. განმარტა თავად სოციალური სახელმწიფოს იდეა, ნეგატიური და პოზიტიური თავისუფლების ცნებები, თავისუფალ სამართლებრივ სახელმწიფოსა და სოციალურ სამართლებრივ სახელმწიფოს შორის განსხვავება და ა.შ. ყოველივე ზემოაღნიშნული მიმოიხილა გერმანიის მაგალითზე და იმსჯელა საქართველოზე თავისუფლების კუთხით წინსვლის შესაბამისად.
მოხსენების შემდგომ გაიმართა დისკუსია სტუმარსა და სტუდენტებს შორის, რაშიც აქტიურად ჩაერთვნენ მოწვეული პროფესორები და ფაკულტეტის დეკანი. აღნიშნული შეხვედრა დაფინანსდა სამართლისა და საერთაშორისო ურთიერთობების ფაკულტეტის ბიუჯეტიდან.

ფაკულტეტის საბჭოს მორიგი სხდომა გაიმართა

2017 წლის ოქტომბერს 30 სტუ-ს სამართლისა და საერთაშორისო ურთიერთობების ფაკულტეტის საბჭოს მორიგი სხდომა გაიმართა. სხდომას ფაკულტეტის დეკანი, პროფესორი ირაკლი გაბისონია უძღვებოდა.
თავდაპირველად დეკანმა საბჭოს წევრებს გააცნო სტუ-ს აკადემიური საბჭოს წევრის ვაკანტურ ადგილებზე არჩევნების დანიშვნის შესახებ, ვინაიდან, სტუ-ს აკადემიური საბჭოს წევრის ვაკანტურ ადგილებზე, 4 წლის უფლებამოსილების ვადით წარმომადგენლების ასარჩევად არჩევნები 14 ნოემბერს დაინიშნა. ფაკულტეტის საბჭოზევე დამტკიცდა აღნიშნული არჩევნის საარჩევნო კომისია რომელიც საარჩევნო პრინციპებზე დაყრდნობით წარუძღვება არჩევნებს.
საარჩევნო კომისიის კომისიის წევრებად არჩეულ იქნენ: პროფესორები ჯემალ გაბელია, მაია ყიფიანი, ავთანდილ სონღულაშვილი, გიორგი კალანდაძე, თემურ ბეჟოშვილი, ნიკოლოზ ფიფია და სტუდენტი მარიამ ბურდული. აღნიშნულ კანდიდატურებს საბჭოს წევრებმა ერთხმად დაუჭირეს მხარი.
მეორედ საკითხად საბჭომ განიხილა უკრაინის უნივერსიტეტიდან ორი პროფესორი ვიზიტის დაფინანსების საკითხი,რომლებიც წაიკითხავენ საჯარო ლექციებს ისეთ საინტერესო თემებზე როგორიცაა ტერორიზმი და სხვა.
საბჭომ ასევე იმსჯელა სასწავლო ცხრილებისა და სასწავლო პოლიტიკის სრულყოფილ განხორციელებასთან დაკავშირებით. აღსანიშნავია, რომ დეკანმა ირაკლი გაბისონიამ მადლობა გადაუხადა პროფესორ ჰენრი კუპრაშვილს საუკეთესო ხარისხით ჩატარებული ლექცია-სემინარებისათვის. ამასთანავე, სხვა პროფესორებთანაც მიმოიხილა ძირითადი სასწავლო პრინციპები და განუმარტა მათ კიდევ ერთხელ, რომ პატივი სცენ სტუდენტის უფლებებს და პირნათლად შეასრულონ საკუთარი მოვალეობები, წინააღმდეგ შემთხვევაში კი საბჭოს გადაწყვეტილებით მოხდება მათთან შრომითი ხელშეკრულების შეწყვეტა.ვინაიდან, ფაკულტეტისთვის პრიორიტეტია ხარისხიანი, სრულყოფილი ლექციების ჩატარება და სტუდენტთა უფლებების განუხრელი დაცვა.
დეკანმა ასევე წამოაყენა საკითხი ინტერდისციპლინარული, კვლევითი ინსტიტუტის შექმნასთან დაკავშირებით, კერძოდ, სამართლისა და საერთაშორისო ურთიერთობების ფაკულტეტისა და ბიზნესტექნოლოგიების ფაკულტეტის მიერ ერთობლივი დაფინანსებით და მხარდაჭერით შეიქმნება ბიზნესისა და სამართლის კვლევით ინსტიტუტი. აღნიშნულ პროექტში მონაწილეობას მიიღებენ ორივე ფაკულტეტის პროფესორ-მასწავლებლები და სტუდენტები.
საბჭომ ასევე მიიღო გადაწყვეტილება შემუშავდეს სოციალური პროექტის კრიტერიუმები, რომელიც გულისხმობს ისეთი სტუდენტების დაფინანსებას, რომლებსაც არ აქვთ შესაძლებლობა თავად დაფარონ სწავლის გადასახადი. ამავე დროს განიხილეს ორი სტუდენტის განცხადება, სწავლის დაფინანსებასთან დაკავშირებით, რომელიც საბჭოს მიერ დაკმაყოფილდა.

2017 წლის 30 ოქტომბერს საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტზე არსებული ,,პრაქტიკული სამართლის კლინიკის“ განახლებული პროგრამის პრეზენტაცია ჩატარდა.
აღნიშნულ შეხვედრას ესწრებოდნენ ფაკულტეტის დეკანი პროფესორი ირაკლი გაბისონია და დეკანის მოადგილე პროფესორი ჯემალ გაბელია, ფაკულტეტის სტუდენტებთან ერთად. სამართლის კლინიკის ხელმძღვანელმა მარიამ აბულაძემ თავდაპირველად მადლობა გადაუხადა პროფესორებს ირაკლი გაბისონიას და ჯემალ გაბელიას მათ მიერ გაწეული საქმიანობისთვის.
მარიამ აბულაძემ ისაუბრა პრაქტიკული სამართლის კლინიკის შესახებ, რომელიც წარმოადგენს საუნივერსიტეტო ბაზაზე შექმნილ სივრცეს, სასწავლო დისციპლინას, სადაც ხდება სტუდენტის ცოდნის ადაპტირება პრაქტიკასთან. კლინიკის მიზანია დაეხმაროს, სამართლის საბაკალავრო და სამაგისტრო პროგრამის სტუდენტებს უნივერსიტეტში მიღებული თეორიული ცოდნა გამოიყენონ პრაქტიკაში; შეისწავლონ ადვოკატირების უნარ-ჩვევები. სტუდენტები პროფესორებისა და პრაქტიკოსი იურისტების ზედამხედველობით ეუფლებიან პრაქტიკულ გამოცდილებას, რაც ძალიან მნიშვნელოვანია მათი მომავალი პროფესიული საქმიანობისათვის.
2008 წლიდან საქართველოს ტექნიკურ უნივერსიტეტში ფუნქციონირებს პრაქტიკული სამართლის კლინიკა. ამ ხნის განმავლობაში აღნიშნული კლინიკის მიერ განხორციელებული იქნა უამრავი პროექტი, კერძოდ:
- უფასო იურიდიული კონსულტაცია;
- იმიტირებული სასამართლო პროცესები;
- სწავლების კურსი თბილისის სხვადასხვა სკოლებში და სხვა.
ასევე, პრაქტიკული სამართლის კლინიკის მიერ გაფორმებული მემორანდუმების საფუძველზე საქართველოს ტექნიკური უნივერსიტეტის სტუდენტებმა გაიარეს პრაქტიკები საქართველოს სხვადასხვა სახელმწიფო უწყებებში, მათ შორის სასამართლო სისტემაში. წლების განმავლობაში პრაქტიკული სამართლის კლინიკის ხელმძღვანელებმა გაწიეს უზარმაზარი სამუშაო.
ზემოაღნიშნული შეხვედრის მიზანს წარმოადგენდა სტუდენტებისათვის განახლებული სამართლის კლინიკის შესახებ სრულყოფილი ინფორმაციის მიწოდება, განახლებული მიზნებისა და პროექტების გაცნობა.
სამართლის კლინიკის ხელმძღვანელობა სტუდენტებს სთავაზობს, როგორც პრაქტიკულ საქმიანობას ასევე მოკლევადიან სასწავლო კურსებს, კერძოდ:
- იმიტირებულ სასამართლო პროცესებს/ სასამართლოში გამოსვლის ხელოვნებას;
- საპარლამენტო დებატებს/ პრეზენტაციის ჩატარების ტექნიკას;
- იურიდიული ინგლისურის კურსებს;
- პროფესიული უნარ-ჩვევების კურსებს, როგორიცაა სამართლებრივი წერის უნარ-ჩვევები იურიდიული დოკუმენტების შედგენის ტექნიკა.
- და სხვა კურსები მაგალითისთვის, კონფლიქტების კურსი, შეზღუდული შესაძლებლობის მქონე პირთა უფლებები, ლტოლვილთა და დევნილთა სამართალი და სხვა.

ასევე პრაქტიკული სამართლის კლინიკის ფარგლებში გაიმართება საჯარო ლექციები, საჯარო დისკუსიები და შეხვედრები საზოგადოებისთვის მნიშვნელოვან პირებთან აგრეთვე ექსკურსიები საჯარო დაწესებულებებში. ამასთანავე, ტრადიციულად პრაქტიკული სამართლის კლინიკის საქმიანობაში ჩართული სტუდენტები გაუწევენ უფასო იურიდიულ კონსულტაციას მოქალაქეებს და ასევე წაიკითხავენ სალექციო კურსებს თბილისის სკოლებში. პრაქტიკული სამართლის კლინიკა სამომავლოდ გეგმავს საერთაშორისო იმიტირებულ პროცესებზე მიავლინოს სტუდენტთა ჯგუფი.