განცხადება !!!

დავალიანების მქონე ყველა  სტუდენტი ვალდებულია  დაუყოვნებლივ გადაიხადოს სწავლის საფასური. წინააღმდეგ შემთხვევაში შეუჩერდება სტუდენტის სტატუსი !!!

სამართლისა და საერთაშორისო ურთიერთობების ფაკულტეტის მენეჯერი, სამართლის დეპარტამენტის მოწვეული ლექტორი ანა ფუტკარაძე 2017 წლის 5 ივლისს სადისერტაციო საბჭოს წინაშე წარსდგა თემით: “ეთიკური ქცევის სტანდარტები და საჯარო მმართველობა” და საჯარო მმართველობის დოქტორის ხარისხი მიენიჭა.

სამართლისა და საერთაშორისო ურთიერთობების ფაკულტეტის დეკანი, ფაკულტეტის საბჭო და მთლიანად ფაკულტეტი ულოცავს ახალგაზრდა მეცნიერს დოქტორის აკადემიური ხარისხის მიღებას და უსურვებს შემდგომ წარმატებებს სამეცნიერო საქმიანობაში.

ახალგაზრდა, კვალიფიციური და პროფესიონალი კადრები პრიორიტეტია სამართლისა და საერთაშორისო ურთიერთობების ფაკულტეტისთვის.

ზუგდიდის შოთა მესხიას სახელმწიფო უნივერსიტეტისა და საქართველოს ტექნიკური უნივერსიტეტის ერთობლივი ინიციატივით, ასევე საქართველოს პრეზიდენტის სარეზერვო ფონდის თანადაფინანსებით, ზუგდიდის შოთა მესხიას სახელმწიფო უნივერსიტეტში  2017  წლის 23 დან 29 ივლისის ჩათვლით ჩატარდა საზაფხულო სკოლა თემაზე: ,,კონსტიტუციური სახელმწიფო და ძირითადი უფლებები“.

საზაფხულო სკოლის პროექტი მიზნად ისახავდა აკადემიური და საზოგადოებრივი დისკუსიების ხელშეწყობას თანამედროვე ქართული სივრცისთვის ისეთ რელევანტურ სოციალურ, პოლიტიკურ და სამართლებრივ საკითხებზე, როგორიცაა: სამართლებრივი და სოციალური სახელმწიფო, კონსტიტუციური სახელმწიფოს პრინციპები, ადამიანის ძირითადი უფლებები და თავისუფლებები, და სხვა.
საზაფხულო სკოლის მონაწილეებს საშუალება აქვთ მოისმინონ ქართველი და ევროპელი მეცნიერების თეორიული ლექციები, ჩაიწერონ მასალები, პროექტის ფარგლებში წაკითხეული სემინარები გადაითარგმნება ქართულად და  გამოქვეყნდება კრებულებში
საზაფხულო სკოლაში მონაწილეობას იღებდნენ საქართველოს ტექნიკური უნივერსიტეტის, ზუგდიდის სახელმწიფო უნივერსიტეტის, ქუთაისის სახელმწიფო უნივერსიტეტის, ილიას სახელმწიფო უნივერსიტეტის, საქართველოს საზოგადოებრივ საქმეთა ინსტიტუტის და სხვა სახელმწიფო თუ კერძო უნივერსიტეტების სტუდენტები, რომლებიც დაესწრნენ სემინარებს და შესაძლებლობა ჰქონდათ მონაწილეობა მიეღოთ დისკუსიებში.
პროფესორი მამუკა ბერიაშვილი მსმენელები გაეცნენ ისეთ მნიშვნელოვან თემებს როგორიცაა: სამართლებრივი სახელმწიფო, როგორც ზნეობრივი სახელმწიფო, ლევან შატბერაშვილმა წაიკითხა ლექცია თემაზე: „ადამიანის უფლებების დაფუძნება, გეორგ ლომანმა გააცნო სტუდენტებს ადამიანის უფლებებისა და ევროპულ კონსტიტუციის შესახებ საკუთარი შეხედულებები და სხვა არაერთი მნიშვნელოვანი ლექცია-სემინარი ჩაუტარდათ საზაფხულო სკოლის მონაწილეებს.
სტუ-ს სამართლისა და საერთაშორისო ურთიერთობების ფაკულტეტის დეკანი, პროფესორი ირაკლი გაბისონია უსურვებს წარმატებებს საზაფხულო სკოლის მონაწილე სტუდენტებს და გამოთქვამს იმედს, რომ სხვა დროსაც აქტიურად ჩაერთვებიან მსგავს საგანმანათლებლო ღონისძიებებში.

სტუ-ს სამართლისა და საერთაშორისო ურთიერთობების მოწვეულ სპეციალისტს ყველასთვის ცნობილ და სტუდენტების რჩეულ ლექტორს მალხაზ ჩიტაიას  საჯარო მმართველობის  დოქტორის ხარისხი მიენიჭა.

აწ უკვე დოქტორმა მალხაზ ჩიტაიამ  2017 წლის 22 ივლისს  სტუ-ს ბიზნეს-ტექნოლოგიების  ფაკულტეტის სადისერტაციო საბჭოს წინაშე წარმოადგინა თემა: ,,მდგრადი განვითარება – საქართველოს ეროვნული უსაფრთხოების საფუძველი“ .

სადისერტაციო თემის საჯარო დაცვას ესწრებოდნენ სამართლისა და საერთაშორისო ურთიერთობების ფაკულტეტის დეკანი, პროფესორი ირაკლი გაბისონია, დეკანის მოადგილე, პროფესორი ჯემალ გაბელია და  სხვადასხვა სპეციალობის პროფესორები და მეცნიერ-თანამშრომლები.

სადისერტაციო თემის საჯარო განხილვა მეტად საინტერესოდ წარიმართა, საკვლევი თემის ირგვლივ დოქტორანტის მიერ შემოთავაზებულმა რეკომენდაციებმა და წინადადებებმა ერთობ დიდი მოწონება დაიმსახურა როგორც სადისერტაციო კომისიის წევრებს შორის, ასევე დამსწრე საზოგადოებაში.

დოქტორანტმა მალხაზ ჩიტაიამ უმაღლესი შეფასება მიიღო კომისიის მიერ და ერთხმად მიენიჭა საჯარო მმართველობის დოქტორის ხარისხი.

სტუ-ს სამართლისა და საერთაშორისო ურთიერთობების ფაკულტეტის დეკანი  პროფესორი ირაკლი გაბისონია ულოცავს მალხაზ ჩიტაიას დოქტორის ხარისხის მინიჭებას, მოხარულია რომ წარმატებულად წარსდგა  სადისერტაციო  საბჭოს  წინაშე. დარწმუნებულია რომ ისევე ღირსეულად გააგრძელებს სამეცნიერო საქმიანობას როგორ ღირსეულადაც მოიპოვა დოქტორის ხარისხი.

სტუ-ს სამართლისა და საერთაშორისო ურთიერთობების ფაკულტეტის დეკანის  პროფესორის ირაკლი გაბისონიას მილოცვას უერთდება დეკანის მოადგილე პროფესორი ჯემალ გაბელია და ფაკულტეტის ყველა მეცნიერ-თანამშრომელი. ფაკულტეტის ადმინისტრაცია ამაყობს მალხაზ ჩიტაიას მსგავსი ახალგაზრდა დოქტორებით, რომლებიც ახორციელებენ პედაგოგიურ საქმიანობას იმ მიზნით, რომ აღზარდონ საკუთარი პროფესიის მოყვარული და წარმატებული იურისტები. მოხარულნი არიან რომ ისინი ერთობლივად გააგრძელებენ სამეცნიერო მოღვაწეობას.

2017 წლის 22 ივლისს საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ბაკალავრიატისა და მაგისტრატურის კურსდამთავრებულთათვის გამოსაშვები საზეიმო ღონისძიება გაიმართა.
ღონისძიება გახსნა სტუ-ს სამართლისა და საერთაშორისო ურთიერთობების ფაკულტეტის დეკანმა პროფესორმა ირაკლი გაბისონიამ, რომელმაც მადლობა გადაუხადა სტუდენტებსა და მოწვეულ სტუმრებს მობრძანებისათვის და სიტყვა გადასცა სტუ-ს სასწავლო პროცესის მეთოდური უზრუნველყოფის უფროსს გიორგი აბრამიშვილს.
ბატონმა გიორგიმ მიულოცა კურსდამთავრებულებს სასწავლო პროგრამის წარჩინებით დამთავრება, მოუწოდა მათ სამაგისტრო პროგრამებზე სწავლის გაგრძელება და უსურვა კარიერული წინსვლა.
სტუ-ს სამართლისა და საერთაშორისო ურთიერთობების ფაკულტეტის დეკანმა პროფესორმა ირაკლი გაბისონიამ ყურადღება გაამახვილა იმაზე, რომ წელს ფაკულტეტს პირველი გამოსაშვები ღონისძიება აქვს. აღნიშნა, რომ ეს კურსი არაჩვეულებრივი სტუდენტებისაგან შედგება და ფაკულტეტი ამაყობს ჩვენი კურსდამთავრებულებით.
სტუ-ს სამართლისა და საერთაშორისო ურთიერთობების ფაკულტეტის დეკანის მოადგილემ, პროფესორმა ჯემალ გაბელიამ დიდი სიყვარულით მიულოცა სტუდენტებს სწავლის დასრულება, გამოთქვა იმედი, რომ მათი უმრავლესობა სტუ-ს დაუბრუნდება, როგორც მაგისტრანტი, დოქტორანტი და პროფესორ-მასწავლებელი.
სტუ-ს სამართლისა და საერთაშორისო ურთიერთობების ფაკულტეტის მოწვეულმა პროფესორმა ვახტანგ ჟვანიამ  წარმატებები უსურვა კურსდამთავრებულებს და გამოთქვა იმედი, რომ როგორც კოლეგები კიდევ არაერთხელ შეხვდებიან  პროფესიულ გზაზე ერთმანეთს.
სტუ-ს სამართლისა და საერთაშორისო ურთიერთობების ფაკულტეტის ასოცირებულმა პროფესორმა გიორგი კალანდაძემ სტუდენტებს წარმატებები უსურვა ისეთ რთულ მეცნიერებაში, როგორიცა სამართალმცოდნეობა.
სტუმრებს მიესალმნენ კურსდამთავრებულები თინათინ დადუნაშვილი, გვანცა წახრაკია, მარიამ კიკნაძე და სხვა სტუდენტები, რომლებმაც გულითადი მადლობა გადაუხადეს სტუ-ს ადმინისტრაციას, სამართლისა და საერთაშორისო ურთიერთობების ფაკულტეტის დეკანს ირაკლი გაბისონიას, დეკანის მოადგილეს ჯემალ გაბელიას და თითოეულ ლექტორს, ყოველი დღისთვის და იმ დიდი წვლილის შეტანისთვის რასაც სტუდენტის ჩამოყალიბება ჰქვია.
სტუდენტებმა აღნიშნეს, რომ სამართლისა და საერთაშორისო ურთიერთობების ფაკულტეტმა უკვე შეძლო თავის დამკიდრება, როგორც პოპულარულმა და წარმატებულმა და იგი სათანადო კონკურენციას უწევს სხვა უნივერსიტეტებს, რასაც ცხადყოფს მის მიერ განხორციელებული არაერთი წარმატებული პროექტი.
დასასრულს, სტუ-ს სამართლისა და საერთაშორისო ურთიერთობების ფაკულტეტის დეკანმა პროფესორმა ირაკლი გაბისონიამ მოუწოდა სტუდენტებს ჩააბარონ ამავე უნივერსიტეტში სამაგისტრო პროგრამებზე, გამოთქვა მზადყოფნა მათი დახმარებისათვის, როგორც სამომავლოდ დასაქმების კუთხით ასევე, სამეცნიერო საქმიანობაში აქტიური თანამშრომლობის თვალსაზრისით.

2017 წლის 21 ივლისს საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის დეკანი პროფესორი ირაკლი გაბისონია პროფესორ-მასწავლებლებს შეხვდა.
შეხვედრა მიზნად ისახავდა პროფესორ-მასწავლებლებისათვის საკონკურსო პირობების და წესების გაცნობას. დეკანმა დეტალურად გააცნო დამსწრე საზოგადოებას კონკურსის ვადები, წესები, საკონკურსო დოკუმენტაციისა და საკონკურსო კომისიის შესახებ ინფორმაცია. მათ შორის,
კონკურსის ძირითადი პირობები:
პროფესორად შეიძლება არჩეულ იქნეს დოქტორის ხარისხის მქონე პირი, რომელსაც აქვს სამეცნიერო-პედაგოგიური მუშაობის არანაკლებ 6 წლის გამოცდილება;
ასოცირებულ პროფესორად შეიძლება არჩეულ იქნეს დოქტორის აკადემიური ხარისხის მქონე პირი, რომელსაც აქვს სამეცნიერო-პედაგოგიური მუშაობის არანკლებ 3 წლის გამოცდილება;
ასისტენტ-პროფესორად შეიძლება არჩეულ იქნეს დოქტორის აკადემიური ხარისხის მქონე პირი;
ასისტენტად შეიძლება არჩეულ იქნეს დოქტორანტი.
კონკურსის ვადები:
კონკურსი ჩატარდება 2017 წლის 12 აგვისტოდან 05 სექტემბრის ჩათვლით. კონკურსის პირველადი შედეგები გამოქვეყნდება არაუგვიანეს 2017 წლის 05 სექტემბრისა, კონკურსის შედეგების დამტკიცება აკადემიურ საბჭოში მოხდება 11 სექტემბერს.
კონკურსში არ დაიშვება პირი, რომელსაც უმაღლესი საგანმანათლებლო დაწესებულებაში აკადემიური თანამდებობის დაკავება შეზღუდული აქვს მოქმედი კანონმდებლობით.
პირი, რომელიც მუშაობს სხვა უმაღლეს საგანმანათლებლო დაწესებულებაში და სტუ-ში გაიმარჯვებს კონკურსში, შრომითი ხელშეკრულების გაფორმებამდე სტუ-თან უნდა გააფორმოს აფილირების ხელშეკრულება.
პროფესორ-მასწავლებლებმა დასვეს შეკითხები, გამოთქვეს შეხედულება კონკურსის შესახებ და იმედოვნეს, რომ გააგრძელებენ სამომავლოდ თანამშრომლობას.
სტუ-ს სამართლისა და საერთაშორისო ურთიერთობების ფაკულტეტის დეკანმა პროფესორმა ირაკლი გაბისონიამ კიდევ ერთხელ მოუწოდა პროფესორ-მასწავლებლებს მიიღონ მონაწილეობა კონკრუსში და უსურვა წარმატებები .

სამართლისა და საერთაშორისო ურთიერთობების ფაკულტეტის კურსდამთავრებული მეგი ჯაფარიძე ჩაირიცხა Sapienza University of Rome-ში სამაგისტრო პროგრამაზე. მან 2017 წელს წარჩინებით დაამთავრა სტუ-ს სამართლისა და საერთაშორისო ურთიერთობების ფაკულტეტი. 2013 წელს მიიღო მონაწილეობა USAID-ის საზაფხულო სკოლაში “IFES Democracy and Citizenship”, სადაც წარმოადგენდა საქართველოს ტექნიკურ უნივერსიტეტს.
2014/2015 წელს გახდა ევროკავშირის სტიპენდიანტი და სწავლობდა ტალინის უნივერსიტეტში, ესტონეთში. 2015წელს მიიღო მონაწილეობა ნატოს ახალგაზრდულ სამიტზე.
2016 წელს სტუ-ს სამართლისა და საერთაშორისო ურთიერთობების ფაკულტეტის სამართლის კლინიკის ფარგლებში, მონაწილეობა მიიიღო საერთაშორისო სისხლის სამართლის იმიტირებულ პროცესში, რომელიც ჩატარადა ჰააგაში, ნიდერლანდები; იმავე წელს მონაწილეობდა „პროაქტივ ჯგუფის“ მიერ ორგანიზებულ საერთაშორისო ახალგაზრდა ლიდერთა სამიტზე „ახალგაზრდული გამოწვევები და შესაძლებლობები“, როგორც საქართველოს ტექნიკური უნივერსიტეტის წარმომადგენელი; ასევე, მიიღო მონაწილეობა სამართლისა და საერთაშორისო ურთიერთობების ფაკულტეტის სამართლის კლინიკის მიერ ორგანიზებულ საზაფხულო სკოლაში თემაზე: საკონსტიტუციო სამართალწარმოება, რომელიც ჩატარდა ქალაქ ბათუმში. 2017 წელს მონაწილეობდა ეროვნულ კლიენტთა კონსულტირების ტრენინგსა და შეჯიბრში, როგორც საქართველოს ტექნიკური უნივერსიტეტის წარმომადგენელი.
სტუ-ს სამართლისა და საერთაშორისო ურთიერთობების ფაკულტეტის დეკანი, პროფესორი ირაკლი გაბისონია შეხვდა მეგი ჯაფარიძეს მიულოცა სამაგისტრო პროგრამაზე ჩარიცხვა Sapienza University of Rome-ში და უსურვა შემდგომი წარმატებები.

საქართველოს საკონსტიტუციო სასამართლომ, საქართველოს ტექნიკურ უნივერსიტეტთან გაფორმებული ურთიერთთანამშრომლობის მემორანდუმის საფუძველზე, მიმდინარე წლის 13-18 ივლისს, უკვე მეხუთედ, უმასპინძლა საზაფხულო სკოლას „საკონსტიტუციო სამართალწარმოება“. ტექნიკური უნივერსიტეტის სტუდენტებს, ამავე უნივერსიტეტის პროფესორებთან ერთად, საქართველოს საკონსტიტუციო სასამართლოს მრჩევლები საკონსტიტუციო სამართალწარმოების პრაქტიკულ ასპექტებზე ესაუბრნენ, ლექციებზე მიმოიხილეს საქართველოს საკონსტიტუციო სასამართლოს გადაწყვეტილებები. სალექციო კურსის პარალელურად სტუდენტები სასამართლოში მიმდინარე პროცესებსაც ესწრებოდნენ. დასასრულს, საზაფხულო სკოლის მონაწილეებს საქართველოს საკონსტიტუციო სასამართლოს თავმჯდომარე ზაზა თავაძე მიესალმა და სტუდენტები საზაფხულო სკოლაში მონაწილეობის დამადასტურებელი სერთიფიკატებით დააჯილდოვა.

გრძელდება საზაფხულო სკოლა სტუ-ს სამართლისა და საერთაშორისო ურთიერთობების სტუდენტებისთვის ქ. ბათუმში, საქართველოს საკონსტიტუციო სასამართლოში.
15 ივლისს საზაფხულო სკოლის მსმენელებს შეხვდა საქართველოს საკონსტიტუციო სასამართლოს მთავარი მრჩეველი გვანცა კვარაცხელია, რომელმაც წაიკითხა ლექცია თემაზე: „საკონსტიტუციო სასამართლო, როგორც ადამიანის უფლებათა დაცვის მექანიზმი“.
სტუ-ს პროფესორებმა ნინო ქურასბედიანმა და დავით ჭრიკიშვილმა ლექციის სახით სტუდენტებს გააცნეს ისეთი აქტუალური საკითხები, როგორიცაა საზღვარგარეთის ქვეყნების საკონსტიტუციო კონტროლის საშუალებები და შედარებით-სამართლებრივი ანალიზის საფუძველზე წარმოაჩინეს დადებითი და უარყოფითი ასპექტები.

2017 წლის 10-15 ივლისს საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის მაგისტრატურის სტუდენტებისათვის გაიმართა სამაგისტრო ნაშრომების საჯარო დაცვა.
აკადემიური უმაღლესი განათლების მაგისტრატურის საგანმანათლებლო პროგრამის აუცილებელ ელემენტს წაროადგენს კვლევითი კომპონენტი, რომელიც მიმართულია მაგისტრატურის სტუდენტის დამოუკიდებელ თეორიულ და პრაქტიკულ მსჯელობასა და უნარის განვითარებაზე.
მაგისტრატურის საგანმანათლებლო პროგრამის კვლევითი კომპონენტი მოიცავს 45 კრედიტს. მისი სავალდებულო ელემენტებია: სამაგისტრო კვლევის პროექტი – პროსპექტუსი, თეორიული/ექსპერიმენტული კვლევა – კოლოკვიუმი და სამაგისტრო ნაშრომის დასრულება და დაცვა.
დასრულებული საკვალიფიკაციო ნაშრომი უნდა წარმოადგენდეს მაგისტრანტის დამოუკიდებელი კვლევითი მუშაობის შედეგს. საკვალიფიკაციო ნაშრომში ასახული უნდა იყოს ჩატარებული თეორიული/ექსპერიმენტული კვლევით მიღებული შედეგები.
დასრულებული საკვალიფიკაციო ნაშრომის წარდგენის, საჯარო დაცვისა და საბოლოო შეფასების პროცედურები დადგენილია უნივერსიტეტის აკადემიური საბჭოს მიერ დამტკიცებული „დებულება მაგისტრატურის შესახებ“ (2012 წლის 26 ივნისის № 704 დადგენილება) ხოლო მაგისტრის აკადემიური ხარისხის მოსაპოვებლად წარდგენილი ნაშრომის გაფორმება სავალდებულოა დადგენილი ინსტრუქციის შესაბამისად.
საკვალიფიკაციო ნაშრომის შეფასება ხდება 100 ქულით. აუცილებელია მისი საჯარო დაცვა. საკვალიფიკაციო ნაშრომს აფასებს 5-7 წევრისაგან შემდგარი სამაგისტრო კომისია 100 ქულიანი შეფასების სისტემით, შემდეგი კრიტერიუმების შესაბამისად:
√ საკვლევი პრობლემის აღწერა, აქტუალურობა,
√ პრაქტიკული მნიშვნელობა
√ საკვლევი თემის ირგვლივ არსებული ლიტერატურის ანალიზი
√ კვლევის მეთოდების გამოყენება
√ ჩატარებული კვლევის შედეგების განსჯა
√ ჩატარებული კვლევის საფუძველზე დასკვნის გაკეთება
√ ნაშრომის გაფორმების ხარისხი და მისი წარმოჩენის ხარისხი.
მაგისტრანტის საჯარო დაცვის შეფასება განისაზღვრება კომისიის თითოეული წევრის მიერ მიღებული ქულების საშუალო არითმეტიკულით, ამასთან საკვალიფიკაციო ნაშრომი არ ითვლება დაცულად, თუ სამაგისტრო კომისიის წევრთა უმრავლესობა მას აფასებს 20-ზე ნაკლები ქულით. კენჭისყრისას ხმების თანაბრად განაწილების შემთხვევაში გადამწყვეტია საგამოცდო კომისიის თავმჯდომარის ხმა.
სტუდენტების მიერ დამუშავებული კვლევები შეეხებოდა ისეთ პრობლემურ და აქტუალურ საკითხებს, როგორიცაა: სასამართლო მტკიცება და მტკიცებულებები სამოქალაქო პროცესში.შვილად აყვანის თავისებურებანი საქართველოში, გაკოტრების მმართველის პრობლემა გაკოტრების სამართალში, ხელშეკრულების განმარტება-1980 წლის საქონლის საერთაშორისო ნასყიდობის შესახებ გაეროს კონვენციის მიხედვით”,ანდერძით მემკვიდრეობა, ნარკოტიკული დანაშაული, ორგანიზებული დანაშაულობა, არასრულწლოვანთა სისხლისსამართლებრივი პასუხისმგებლობისა და დასჯის თავისებურებანი, სასჯელასრულების სისტემა საქართველოში და მისი შედარებითი ანალიზი, კრიმინალური ანთროპოლოგია, ბრალდებული სისხლის სამართლის პროცესში, ნაფიც მსაჯულთა ვერდიქტის დაუსაბუთებლობის პრობლემები, განზრახ მკვლელობა უეცარი ძლიერი სულიერი აღელვების მდგომარეობაში და სხვა.
სამაგისტრო კომისიის თავმჯდომარემ, სტუ-ს სამართლისა და საერთაშორისო ურთიერთობების ფაკულტეტის დეკანმა, პროფესორმა ირაკლი გაბისონიამ დადებითად შეაფასა წარმოდგენილი საკვალიფიკაციო ნაშრომები, მოისმინა ნაშრომის ავტორთა რეკომენდაციები წამოჭრილ პრობლემურ საკითხებთან დაკავშირებით და წარმატებები უსურვა მათ როგორც სამეცნიერო ასპარეზზე, ასევე პრაქტიკულ მოღვაწეობაში.