გთავაზობთ საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ახალ რუბრიკას „გაიცანი სტუ-დენტი“, რაც საშუალებას მოგცემთ გაიცნოთ ჩვენი ფაკულტეტის სტუდენტები, რომლებიც გამორჩეულნი არიან მაღალი აკადემიური მოსწრებითა და საზოგადოებრივი საქმიანობით.
ამჟამად წარმოგიდგენთ თომა ხაბეიშვილს, რომელიც სწავლობს სამართლისა და საერთაშორისო ურთიერთობების ფაკულტეტის საერთაშორისო ურთიერთობების სპეციალობის მეოთხე კურსზე.
1. მოგესალმებით, თომა, გვიამბეთ თქვენს შესახებ?
მოგესალმებით, მე ვარ თომა ხაბეიშვილი, დავიბადე ქალაქ თბილისში, ვსწავლობდი 133-ე საჯარო სკოლაში, რომელიც დავამთავრე წარჩინებით. 2014 წელს ჩავაბარე საქართველოს ტექნიკურ უნივერსიტეტში.
2. რატომ გადაწყვიტეთ სტუ-ში ჩაბარება ?
პირველ რიგში, გადაწყვეტილება მივიღე, რადგან მინდოდა სახელმწიფო უმაღლეს სასწავლებელში მესწავლა. ასევე, ჩემი მეგობრები სწავლობდნენ აქ. ამიტომაც, საკმაოდ ბევრი ინფორმაცია მქონდა უნივერსიტეტის შესახებ და ეს სრულიად აზრიანი გადაწყვეტილება იყო ჩემის მხრიდან. აუცილებლად უნდა დავამატო, რომ დღესაც ზუსტად იგივე არჩევანს გავაკეთებდი.
3. როგორც ვიცით, ფაკულტეტის თვითმმართველობის თავმჯდომარე ხართ, გააცანით მკითხველს თქვენი თავი ამ კუთხით?
2015 წელს ბიზნეს-ინჟინერინგის ფაკულტეტის სტუდენტური გამგეობის მიერ დავინიშნე სტუდენტური თვითმმართველობის თავმჯდომარედ, როდესაც ფაკულტეტები გაიყო ხელახალი არჩევნების წესით დავინიშნე სამართლისა და საერთაშორისო ურთიერთობების ფაკულტეტის თვითმმართველობის თავმჯდომარედ. მსგავსი სახის ნდობის გამოცხადება ჩემთვის საამაყო და ამავე დროს მეტად საპასუხისმგებლოა. ვიცი, რომ ზოგიერთს არასტანდარტული დამოკიდებულება აქვს თვითმმართველობების მიმართ, მიაჩნიათ რომ ჩვენს მიერ არ კეთდება არაფერი სტუდენტების სასიკეთოდ, თუმცა, ვინც შეისწავლის ჩვენს საქმიანობას მიხვდება რომ არასწორი შეხედულება აქვთ. მე როგორც თვითმმართველობის თავმჯდომარე, სრულად ვაცნობიერებ ჩემს წილ პასუხისმგებლობას ფაკულტეტის განვითარების საქმეში, მერწმუნეთ, ამისთვის დაუღალავად ვშრომობთ თითოეული ჩვენგანი.
4. რა საქმიანობას ეწევა ფაკულტეტის თვითმმართველობა?
დავიწყოთ იქიდან რომ სტუდენტური თვითმმართველობის საქმიანობა არც თუ ისე მწირია და საკმაოდ ბევრ შრომას და ამავდროულად დროს მოითხოვს. პირველ რიგში, სტუდენტური თვითმმართველობის მიზანია სტუდენტს შეუქმნას აქტიური სტუდენტური ცხოვრება. აღნიშნულში იგულისხმება ის, რომ ისინი დატვირთულნი უნდა იყვნენ სპორტული, კულტურული და, რა თქმა უნდა, საგანმანათლებლო ღონისძიებებით. თითოეულმა სტუდენტმა უნდა წარმოაჩინოს თავისი თავი და შესაძლებლობების მაქსიმუმი, ამის საშუალებას კი სტუდენტური თვითმმართველობა ნამდვილად აძლევს.
მოდით ყველაზე მასშტაბურ პროექტზე ვისაუბროთ, რაც კი თვითმმართველობას განუხორციელებია. ეს გახლავთ, სტუ-ს სტუდენტური დღეები, რომელშიც ჩართული იყო ტექნიკური უნივერსიტეტის 10 000-მდე სტუდენტი. ღონისძიება შედგებოდა დაახლოებით 65-ი სახეობის შეჯიბრისგან. ჩვენი ფაკულტეტის სტუდენტური თვითმმართველობის ყველაზე დიდი მიღწევა, სწორედ სტუდენტური დღეების მოგებაა, რადგან მოგეხსენებათ ფაკულტეტი სულ რაღაც ერთი წლის შექმნილია. ჩვენმა გუნდმა შეძლო და მართლაც ყველას დაუმტკიცა ჩვენი შესაძლებლობები.
5. რა სახის პროექტებს სთავაზობთ სტუდენტებს?
პირველი მასშტაბური პროექტი, რაც სტუდენტებისთვის განხორციელდა ეს არის ექსკურსიები, რომელზედაც სტუდენტები აქტიურად ატარებენ მთელ დღეს საქართველოს სხვადასხვა კუთხეებში. მათ შესაძლებლობა აქვთ გაეცნონ სტუდენტური თვითმმართველობის საქმიანობას. ასევე, გაიცნონ ჩვენი ფაკულტეტის სტუდენტები და რაც ყველაზე მთავარია შეისწავლონ საქართველოს ღირსშესანიშნაობები. პროექტს აქვს ყოველკვირეული სახე და ფინანსდება ტექნიკური უნივერსიტეტის მხრიდან, რომელშიც თავისი წვლილი ასევე შეაქვს ფაკულტეტს. ექსკურსიაში მონაწილეობის მიღება შეუძლია ყველა საფეხურის სტუდენტს.
ჩვენს ასევე, ვახორციელებთ შემდეგი სახის კულტურულ და საგანმანათლებლო პროექტებს: რა? სად? როდის?, დებატები, ესეების კონკურსი, იმიტირებული პროცესები, საუკეთესო ორატორი, მხატრული კითხვა, პროფესიული გამოფენა, ფოტო კონკურსი, თანამედროვე ცეკვები, ხალხური სიმღერები და სხვა. რა თქმა უნდა, სპორტითაც აქტიურად ვართ დაკავებულები და ყველას ვთავაზობთ ფეხბურთის, კალათბურთის, ფრენბურთის, ბოულინგის, ბილიარდის, რაგბის, ჭადრაკის, ტენისის, კარტინგის, მკავჭიდის, მძლეოსნობის შეჯიბრებსა და სხვადასხვა ღონისძიებებს.
6. ვის შეუძლია თვითმმართველობის წევრობა და რა არის ამისთვის საჭირო?
სტუდენტური თვითმმართველობის წევრობა შეუძლია ჩვენი ფაკულტეტის ყველა საფეხურის სტუდენტს, რომელსაც უნდა წარმოაჩინოს თავი ამა თუ იმ სფეროში. ამისთვის საჭიროა შემოიტანოს განაცხადი, მოვიდეს გასაუბრებაზე და კანდიდატების ინტერესების შესაბამისად მოხდება მათი დაჯგუფება ჩვენს დეპარტამენტებში, რომელიც არსი შემდეგი სახის: სპორტის, პიარის, კულტურის, განათლების და სოციალურ საკითხთა. ვისარგებლებ შესაძლებლობით და აქვე დავაანონსებ, რომ 15 ნოემბერიდან ვიწყებთ ახალი წევრების მიღებას. ასევე, გაიმართება ღია კარის დღე. ვისურვებდი ბევრმა სტუდენტმა გამოთქვას სურვილი ჩვენს დიდ ოჯახში გაწევრიანების.
7. როგორ ახერხებთ სტუდენტური თვითმმართველობის თავმჯდომარეობა შეუთავსოთ თქვენი როგორც სტუდენტის ცხოვრებას?
უნდა ვაღიარო, ეს დიდ ძალისხმევას მოითხოვს ჩემგან. ერთის მხრივ, არის ჩემი პასუხისმგებლობა და მეორეს მხრივ მეც ჩვეულებრივი სტუდენტი ვარ. ვცდილობ, წარმატებული ვიყო, რამდენად გამომდის ამას დრო გვიჩვენებს.
8. სად ხედავთ თქვენს თავს მომავალში და გვითხარით, ისეთი თანამდებობა რომელზეც ოცნებობთ?
მომავალში ჩემს თავს ვხედავ პოლიტიკაში, რაც შეეხება ოცნების თანამდებობას, ნებისმიერ უმაღლეს პოლიტიკურ თანამდებობას შევიფერებდი (იცინის).
9. რას გვეტყვით ფაკულტეტის ხელმძღვანელობაზე?
პირველ რიგში, მინდა გითხრათ ჩვენი დეკანის შესახებ, ბატონი ირაკლი გაბისონია ფაკულტეტისთვის აკეთებს შესაძლებლობის მაქსიმუმს, იგი არ იშურებს ძალ-ღონეს ფაკულტეტის განვითარებისთვის, განუხრელად იცავს სტუდენტის უფლებებს და მათთან ამყარებს უშუალო ურთიერთობას, გამოირჩევა მეგობრული დამოკიდებულებით ყველას მიმართ. ფაკულტეტზე ასევე არსებობს სოციალურ საკითხთა, სპორტისა და კულტურის განყოფილება, რომელსაც ხელმძღვანელობს გიორგი კალანდაძე, მისი აქტიური ჩართულობით და თვითმმართველობასთან თანამშრომლობით უამრავი რამ კეთდება. კიდევ ერთხელ ვისარგებლებ ამ პლატფორმით და დეკანს ირაკლი გაბისონიას და გიორგი კალანდაძეს მადლობას ვეტყვი.
10. ფაკულტეტის მიერ ორგანიზებულ რომელ ღონისძიებას გამოყოფდით?
გარდა სტუდენტური დღეებისა გამოვყოფდი მეოთხე კურსელთა გამოსამშვიდობებელ საღამოს, რომელიც ზემოთჩამოთვლილი პირების დახმარებით და თვითმმართველობის ორგანიზებით განხორციელდა.
11. რის შეცვლას ისურვებდით უნივერსიტეტში?
ერთადერთი რაც არ მომწონს ეს არის ინტერიერი, უფრო ლამაზი გარემო მოუხდებოდა ჩვენს ფაკულტეტს.
12. რას ურჩევთ სტუ-ს პირველკურსელებს ?
პირველკურსელებს ვურჩევდი იმას, რომ არ გამოტოვონ არცერთი შესაძლებლობა, რომელსაც თვითმმართველობა სთავაზობს. იაქტიურონ, ჩაერთონ ყველაფერში და ჩვენც მაქსიმუმს გავაკეთებთ მათთვის.

გთავაზობთ საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ახალ რუბრიკას „გაიცანი სტუ-დენტი“, რაც საშუალებას მოგცემთ გაიცნოთ ჩვენი ფაკულტეტის სტუდენტები, რომლებიც გამორჩეულნი არიან მაღალი აკადემიური მოსწრებითა და საზოგადოებრივი საქმიანობით.
ამჟამად წარმოგიდგენთ ბაჩო კვირკველიას რომელიც სწავლობს სამართლისა და საერთაშორისო ურთიერთობების ფაკულტეტის სამართლის სპეციალობის მესამე კურსზე.
1. მოგვიყევით რამე თქვენი ბავშვობის შესახებ?
მოგესალმებით. დავიბადე და გავიზარდე ჩხოროწყუს რაიონში. ჩემი ბავშვობის წლები მთლიანად ამ ადგილთან არის დაკავშირებული. დავამთავრე ამავე რაიონის, აფხაზეთის #10 საჯარო სკოლა, სკოლაში სწავლის წლები საუკეთესო იყო ჩემს ცხოვრებაში, მყავდა შესანიშნავი პედაგოგები და ძალიან კარგი კლასელები, რომლებთანაც ბევრი ტკბილი მოგონება და ახლო მეგობრობა მაკავშირებს.
2. რატომ გადაწყვიტეთ სტუ–ში ჩაბარება? თან სამართალზე?
სამართალზე ჩაბარება ჩემი ბავშვობის ერთგვარი ოცნება იყო. გადაწყვეტილებაზე ზეგავლენა უმეტესწილად იქონია მამის პროფესიულმა ფაქტორმა, რომელიც ასევე სამართალმცოდნე გახლდათ. სწორედ ამის გამო ადრეული ასაკიდანვე გამიჩნდა ინტერესი ამ სფეროს მიმართ.
თავიდანვე მქონდა გარკვეული სახის წარმოდგენა სტუში მიმდინარე სასწავლო პროცესზე და აკადემიურ პერსონალზე, რამაც გარკვეული როლი ითამაშა არჩევანი შემეჩერებინა ამ უნივერსიტეტზე.
3.რა განასხვავებს ამ ფაკულტეტს სხვა უნივერსიტეტის სასწავლო პროგრამისგან?
ამ უნივერსიტეტს სხვა უნივერსიტეტის ფაკულტეტისგან განასხვავებს ინოვაციურობა, მუდმივი სიახლეები, ფაკულტეტი სტუდენტებს შესაძლებლობას აძლევს მაქსიმალურად განვითარდნენ პროფესიულად და ჩამოყალიბდნენ წარმატებულ იურისტებად.
4. მოგვიყევით თქვენი სტუდენტური აქტივობის შესახებ.?
2017 წლის მარტის თვეში ამავე უნივერსიტეტის სტუდენტთა ჯფუფი დეპარტამენტის დაფინანსებით და ხელშეწყობით გავემგზავრეთ ნიდერლანდების სახელმწიფოში, სადაც მონაწილეობა მივიღეთ ქალაქ უტრეხტში გამართულ გაეროს მოდელირებულ კონფერენციაში, ვიყავით ქალაქ ჰააგაში საერთაშორისო სისხლის სამართლის სასამართლოში (ICC) და მართლმსაჯულების საერთაშორისო სასამართლოში (ICTJ). ყოველივე ზემოთხსენებულმა არაჩვეულებრივი გამოცდილება შემძინა და ეს მოგზაურობა ჩემთვის ასევე გახდა ერთგვარი სტიმული იმისა, რომ რაც შეძლება მეტს მივაღწიო კარიერულად და მოვახერხო საკუთარი თავის მაქსიმალური რეალიზაცია.
5.სად ხედავთ თქვენს თავს მომავალში?
გადაწყვეტილი მაქვს სასწავლო პერიოდის დამთავრების შემდგომ კერძო სამართლის სფეროში დავკავდე საადვოკატო საქმიანობით. ამავდროულად მაქვს სურვილი სათანადო ხარისხის დაცვის შემდგომ შევუდგე საგანმანათლებლო საქმიანობას უმაღლეს სასწავლებლებში.
6.რომელია თანამდებობა რომელზეც ოცნებობთ?
როგორც ასეთი, კონკრეტულ თანამდებობაზე არ ვოცნებობ. არ მაქვს იმის განზრახვა რომ სამომავლოდ საჯარო სამსახურში დავკავდე, თუნდაც რაიმე სახის მაღალი თანამდებობით. მინდა ჩემი თავის რეალიზაცია კერძო სფეროში განვახორციელო როგორც წარმატებულმა ადვოკატმა და სამომავლოდ გამაჩნია სურვილი დავაფუძნო საკუთარი იურიდიული ფირმა.
7. ცოტა რამ ფაკულტეტის ხელმძღვანელობაზეც მოგვიყევით?.
საქართველოს ტექნიკური უნივერსიტეტის სამართლის და საერთაშორისო ურთიერთობების ფაკულტეტს ყავს გამორჩეული და პროფესიონალებით დაკომპლექტებული ხელმძღვანელობა და აკადემიური პერსონალი, რომლებიც მაქსიმალურად ცდილობენ სტუდენტების ხელშეწყობას. ფაკულტეტის დეკანის – ბატონი ირაკლი გაბისონიას ხელმძღვანელობით ფაკულტეტი დღითიდღე ვითარდება და მეტ შესაძლებლობებს აძლევს სტუდენტებს ჩამოყალიბდნენ როგორც პროფესიონალი კადრები. აუცილებლად უნდა აღინიშნოს, რომ ფაკულტეტის აკადემიური პერსონალი გამოირჩევა სტუდენტებთან მეგობრული დამოკიდებულებით და პროფესიონალური მიდგომით.
8. რა არის ის რაც არ მოგწონთ ფაკულტეტზე? რის შეცვლას ისურვებდით?
ფაკულტეტზე მიმდინარე ყოველი ცვლილება და ინოვაცია ჩემთვის პირადად მისაღები და მოსაწონია და როგორც ამ ფაკულტეტის სტუდენტი ამ ყველაფრით კმაყოფილი და ამაყი ვარ. დარწმუნებული ვარ იმაში რომ ფაკულტეტის წინსვლის პროცესი ასეთი მზარდი ტემპით გაგრძელდება.
9.რამ განაპირობა თქვენი წარმატებული სტუდენტობა?
უპირველესად ეს ოჯახის დამსახურებაა, რადგანაც ისინი მაქსიმალურად გვერდში მიდგანან. მეც პიროვნულად არ მაქვს იმის უფლება, რომ მათ იმედები გავუცრუო. ასევე ამ ყველაფერში დიდი წვლილი მიუძღვის ფაკულტეტის ხელმძღვანელობას, აკადემიურ პერსონალსა და ფაკულტეტის შიგნით არსებულ მეგობრულ გარემოს.
10. რას ურჩევთ სტუს პირველკურსელებს?
უპირველეს ყოვლისა, ყველა პირველკურსელს ვულოცავ ამ ფაკულტეტის სტუდენტობას და წარმატებებს ვუსურვებ მათ არჩეულ პროფესიაში.
მინდა იცოდნენ, რომ ეს არის ფაკულტეტი, სადაც მათი შრომა და მონდომება აუცილებლად დაფასებული იქნება.

საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ასისტენტ-პროფესორის გოგა მამფორიას ინიციატივით სამართლის სპეციალობის სტუდენტები საქართველოს პარლამენტის საკომიტეტო მუშაობას გაეცნენ. შემოქმედებითი ვიზიტი თბილისში საქართველოს პარლამენტის ძველ შენობაში განხორციელდა, როდესაც სტუდენტები უშუალოდ დაესწრნენ დიასპორისა და კავკასიის საკითხთა კომიტეტის სხდომას. მოისმინეს სხდომის მიმდინარეობა, აითვისეს პარლამენტის საქმიანობის სპეციფიკა, დაათვალიერეს საპარლამენტო სხდომის დარბაზი და მიიღეს პასუხები მათთვის სასურველ კითხვებზე.
მსგავსი შემოქმედებითი ვიზიტები სტუდენტების აქტიური ჩართულობით კვლავ გაგრძელდება სახელმწიფო უწყებებში, რათა ჩვენი ფაკულტეტის სტუდენტები უშუალოდ გაეცნენ მათთვის საინტერესო დაწესებულებების მუშაობას.

31 ოქტომბერს სტუ-ს ადმინისტრაციული კორპუსის ცენტრალურ ბიბლიოთეკაში გაიმართა გერმანელი პროფესორის თეო კობუშის საჯარო ლექცია თემაზე: სამართლებრივი სახელწიფო, როგორც სოციალური სახელმწიფო“ პროფესორი, დოქტორი თეო კობუში გახლავთ ანალიტიკური ფილოსოფიისა და რომაულ-კათოლიკური თეოლოგიის სპეციალისტი. იგი არის ემერიტუს პროფესორი ბონის ფრიდრიხ ვილჰემის უნივერსიტეტში, 2003 წლიდან ფილოსოფიის კათედრის გამგე . აგრეთვე, დირექტორი ბონის უნივერსიტეტში. დოქტორი კობუში „ფილოსოფიის ისტორიის ლექსიკონის“ თანარედაქტორია. იგი ასევე არის ფილოსოფიის გერმანულენოვან დოცენტთა კონსორციუმის თავმჯდომარე და ანტიკური ფილოსოფიის საზოგადოების საქმეთა დირექტორი.
აღნიშნული შეხვედრა გახსნა სტუ-ს სამართლისა და საერთაშორისო ურთიერთობების ფაკულტეტის დეკანმა პროფესორმა ირაკლი გაბისონიამ, რომელმაც მადლობა გადაუხადა სტუმარს მობრძანებისთვის, გააცნო დამსწრე საზოგადოებას იგი და ნაყოფიერი საჯარო ლექციის ჩატარება უსურვა. დეკანმა ასევე ყურადღება გაამახვილა ინტერდისციპლინარული პროგრამებით ფაკულტეტის ადმინისტრაციის დაინტერესებაზე, რისი დასტურიც დღევანდელი ღონისძიება გახლავთ.
პროფესორმა თეო კობუშმა ისაუბრა სოციალური სამართლებრივი სახელმწიფოს მნიშვნელობაზე, ცნებებსა და ზოგადად სახელმწიფოს სოციალურ ელემენტებზე. სახელმწიფოებრივი ერთიანობის პრინციპზე დაყრდნობით მიმოიხილა თანამედროვე სოციალური სახელმწიფოები, რომელიც განსაზღვრული იყო ჰეგელის თეორიებითა და შეხედულებებით. განმარტა თავად სოციალური სახელმწიფოს იდეა, ნეგატიური და პოზიტიური თავისუფლების ცნებები, თავისუფალ სამართლებრივ სახელმწიფოსა და სოციალურ სამართლებრივ სახელმწიფოს შორის განსხვავება და ა.შ. ყოველივე ზემოაღნიშნული მიმოიხილა გერმანიის მაგალითზე და იმსჯელა საქართველოზე თავისუფლების კუთხით წინსვლის შესაბამისად.
მოხსენების შემდგომ გაიმართა დისკუსია სტუმარსა და სტუდენტებს შორის, რაშიც აქტიურად ჩაერთვნენ მოწვეული პროფესორები და ფაკულტეტის დეკანი. აღნიშნული შეხვედრა დაფინანსდა სამართლისა და საერთაშორისო ურთიერთობების ფაკულტეტის ბიუჯეტიდან.

ფაკულტეტის საბჭოს მორიგი სხდომა გაიმართა

2017 წლის ოქტომბერს 30 სტუ-ს სამართლისა და საერთაშორისო ურთიერთობების ფაკულტეტის საბჭოს მორიგი სხდომა გაიმართა. სხდომას ფაკულტეტის დეკანი, პროფესორი ირაკლი გაბისონია უძღვებოდა.
თავდაპირველად დეკანმა საბჭოს წევრებს გააცნო სტუ-ს აკადემიური საბჭოს წევრის ვაკანტურ ადგილებზე არჩევნების დანიშვნის შესახებ, ვინაიდან, სტუ-ს აკადემიური საბჭოს წევრის ვაკანტურ ადგილებზე, 4 წლის უფლებამოსილების ვადით წარმომადგენლების ასარჩევად არჩევნები 14 ნოემბერს დაინიშნა. ფაკულტეტის საბჭოზევე დამტკიცდა აღნიშნული არჩევნის საარჩევნო კომისია რომელიც საარჩევნო პრინციპებზე დაყრდნობით წარუძღვება არჩევნებს.
საარჩევნო კომისიის კომისიის წევრებად არჩეულ იქნენ: პროფესორები ჯემალ გაბელია, მაია ყიფიანი, ავთანდილ სონღულაშვილი, გიორგი კალანდაძე, თემურ ბეჟოშვილი, ნიკოლოზ ფიფია და სტუდენტი მარიამ ბურდული. აღნიშნულ კანდიდატურებს საბჭოს წევრებმა ერთხმად დაუჭირეს მხარი.
მეორედ საკითხად საბჭომ განიხილა უკრაინის უნივერსიტეტიდან ორი პროფესორი ვიზიტის დაფინანსების საკითხი,რომლებიც წაიკითხავენ საჯარო ლექციებს ისეთ საინტერესო თემებზე როგორიცაა ტერორიზმი და სხვა.
საბჭომ ასევე იმსჯელა სასწავლო ცხრილებისა და სასწავლო პოლიტიკის სრულყოფილ განხორციელებასთან დაკავშირებით. აღსანიშნავია, რომ დეკანმა ირაკლი გაბისონიამ მადლობა გადაუხადა პროფესორ ჰენრი კუპრაშვილს საუკეთესო ხარისხით ჩატარებული ლექცია-სემინარებისათვის. ამასთანავე, სხვა პროფესორებთანაც მიმოიხილა ძირითადი სასწავლო პრინციპები და განუმარტა მათ კიდევ ერთხელ, რომ პატივი სცენ სტუდენტის უფლებებს და პირნათლად შეასრულონ საკუთარი მოვალეობები, წინააღმდეგ შემთხვევაში კი საბჭოს გადაწყვეტილებით მოხდება მათთან შრომითი ხელშეკრულების შეწყვეტა.ვინაიდან, ფაკულტეტისთვის პრიორიტეტია ხარისხიანი, სრულყოფილი ლექციების ჩატარება და სტუდენტთა უფლებების განუხრელი დაცვა.
დეკანმა ასევე წამოაყენა საკითხი ინტერდისციპლინარული, კვლევითი ინსტიტუტის შექმნასთან დაკავშირებით, კერძოდ, სამართლისა და საერთაშორისო ურთიერთობების ფაკულტეტისა და ბიზნესტექნოლოგიების ფაკულტეტის მიერ ერთობლივი დაფინანსებით და მხარდაჭერით შეიქმნება ბიზნესისა და სამართლის კვლევით ინსტიტუტი. აღნიშნულ პროექტში მონაწილეობას მიიღებენ ორივე ფაკულტეტის პროფესორ-მასწავლებლები და სტუდენტები.
საბჭომ ასევე მიიღო გადაწყვეტილება შემუშავდეს სოციალური პროექტის კრიტერიუმები, რომელიც გულისხმობს ისეთი სტუდენტების დაფინანსებას, რომლებსაც არ აქვთ შესაძლებლობა თავად დაფარონ სწავლის გადასახადი. ამავე დროს განიხილეს ორი სტუდენტის განცხადება, სწავლის დაფინანსებასთან დაკავშირებით, რომელიც საბჭოს მიერ დაკმაყოფილდა.