გთავაზობთ საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ახალ რუბრიკას „გაიცანი სტუ-დენტი“, რომელიც საშუალებას მოგცემთ გაიცნოთ ჩვენი ფაკულტეტის სტუდენტები, რომლებიც გამორჩეულნი არიან მაღალი აკადემიური მოსწრებითა და საზოგადოებრივი საქმიანობით.

ამჟამად წარმოგიდგენთ ანა ცერაძეს, რომელიც სწავლობს სამართლისა და საერთაშორისო ურთიერთობების ფაკულტეტის სამართლის სპეციალობის მეოთხე კურსზე.

მოგესალმებით ანა, გაგვაცანით თქვენი თავი….

მოგესალმებით, მე გახლავართ სამართლისა და საერთაშორისო ურთიერთობების მეოთხე კურსის სტუდენტი, ანა ცერაძე. ვსწავლობ სამართალმცოდნეობის ფაკულტეტის საჯარო მიმართულებაზე. პირველ რიგში, მადლობა მინდა მოგიხადოთ თქვენი რუბრიკის სტუმრად არჩევისათვის, რისი მეშვეობითაც მომეცა საშუალება გავაცნო და გავუზიარო სტუ-ს სტუდენტებს გამოცდილება, რომელიც სწორედ სამართლისა და საერთაშორისო ურთიერთობების ფაკულტეტზე სწავლის პერიოდში მივიღე.

1. რატომ გადაწყვიტეთ სამართალის სპეციალობაზე ჩაგებარებინათ?

მიუხედავად იმისა, რომ პირველი განათლებით პედაგოგი ვარ და მაქვს საჯარო სკოლაში შვიდწლიანი სამუშაო გამოცდილება, ყოველთვის მინდოდა იურიდიული განათლებაც მქონოდა. 27 წლის ასაკში ჩავაბარე საქართველოს ტექნიკურ უნივერსიტეტში, სამართალმცოდნეობის ფაკულტეტზე და ჩემი სანუკვარი ოცნება ახდა. უნივერსიტეტში სწავლების დროს მივხვდი, რომ სწორი არჩევანი გავაკეთე, რადგან სტუ, უპირველეს ყოვლისა, არსებობს სტუდენტებისათვის, აძლევს მას სიღრმისეულ ცოდნას კვალიფიციური ლექტორების მეშვეობით. გარდა ამისა, ფაკულტეტის დეკანი და ადმინისტრაცია მზად არის მოუსმინოს სტუდენტებს, გაიგოს თითოეულის აზრი და გაითვალისწინოს ის.

2. როგორია თქვენი სტუდენტური ცხოვრება?

ჩვენს ფაკულტეტზე ხშირად იმართება საჯარო ლექციები, რომელსაც დიდი სიამოვნებით ვესწრები. გამოვყოფდი რამოდენიმე მათგანს, რომლებიც ჩემთვის ძალიან ნაყოფიერი და საინტერესო იყო: ესტონეთის რესპუბლიკის განათლებისა და კვლევების სამინისტროს შიდა აუდიტის დეპარტამენტის ხელმძღვანელი პირების ვიზიტი სტუ-ში, ელიკო-წიკლაური ლამიხის საჯარო ლექცია, ამერიკელი მოსამართლეები სტუმრობა და გამოცდილების გაზიარება სტუდენტებისათვის, საჯარო ლექცია თემაზე: „ფემიციდი- გენდერის ნიშნით ჩადენილი ქალის მკვლელობა“ და ა.შ. ბაკალავრიატში სწავლების პერიოდში II კურსიდან მოყოლებული-დღემდე ვარ პრეზიდენტის სახელობის სტიპენდიანტი. გავიარე პრაქტიკული კურსი სტუ-ს სამართლისა და საერთაშორისო ურთიერთობების ფაკულტეტის სამართლის კლინიკაში, ტრენინგი „ქალთა მიმართ და ოჯახში ძალადობის აღკვეთის სამართლებრივი საშუალებები“. ერთ-ერთ ჩემ წარმატებულ ნაბიჯად მიმაჩნია ესეების კონკურსი „მასწავლებელი კონსტიტუციაზე“, რომელშიც მივიღე მონაწილეობა, სადაც გადმომეცა სერტიფიკატი.

3. რას აპირებთ, სწავლის დასრულების შემდგომ?

ბაკალავრიატის დასრულების შემდეგ, აუცილებლად ვაპირებ სწავლის გაგრძელებას მაგისტრატურაში და ცალსახად მაქვს გადაწყვეტილი, რომ ეს სწორედ სტუ-ს მაგისტრატურის სასწავლო პროგრამა იქნება. ვფიქრობ, არცერთი სხვა უნივერსიტეტი ვერ მომცემს იმაზე მეტს ვიდრე მე დღეს ვღებულობ ამ გარემოში.

4. მომავლის პროფესიული ხედვაც გაგვიმხილეთ

სამომავლო გეგმების შესახებ ვიტყვი, რომ მინდა ძველი და ახალი პროფესია ერთმანეთს დავუკავშირო და სამეცნიერო-პედაგოგიური მოღვაწეობა გავაგრძელო, ამისათვის ვიცი, რომ წინ მელოდება გრძელი და რთული გზა, მაგრამ დარწმუნებული ვარ, რომ თავს გავართმევ ყველაფერს, რადგან მხარს მიჭერენ და მამხნევებენ ჩემი უსაყვარლესი სტუ-ს ლექტორები და მადლობას ვუხდი მათ ამისათვის. ჩემი ყოველი წარმატება და წინ გადადგმული ნაბიჯი მხოლოდ მათი დამსახურებაა.

5. რას უსურვებდით პირველკურსელებს?

მინდა ყველას ვუსურვო წარმატებული სასწავლო წელი და ვუთხრა, რომ წარმატების მიღწევა შესაძლებელია, უფრო მეტიც, ეს აუცილებლობაა -მთავარი მონდომებაა.

გთავაზობთ საქართველოს ტექნიკური უნივერსიტეტის  სამართლისა და საერთაშორისო ურთიერთობების ფაკულტეტის ახალ რუბრიკას „გაიცანი სტუ-დენტი“, რომელიც საშუალებას მოგცემთ გაიცნოთ ჩვენი ფაკულტეტის სტუდენტები, რომლებიც გამორჩეულნი არიან მაღალი აკადემიური მოსწრებითა და საზოგადოებრივი საქმიანობით.

ამჟამად წარმოგიდგენთ, სამართლისა და  საერთაშორისო ურთიერთობების ფაკულტეტის  მესამე კურსის სტუდენტს მართა ამირანაშვილს.

1. მოგესალმებით, გაეცანით ჩვენს მკითხველს.

        მოგესალმებით, მე ვარ მართა ამირანაშვილი სამართალმცოდნეობის  ფაკულტეტის მესამე კურსის სტუდენტი. მადლობა მინდა გითხრათ, რომ ვარ თქვენი რუბრიკის სტუმარი.  სულ რაღაც ორი წლის წინ ვერც კი წარმოვიდგენდი რომ მომიწევდა ინტერვიუს მიცემა, როგორც  ერთ-ერთ წარმატებულ სტუდენტს და ეს ჩემთვის მართლაც სასიხარულოა.

2 რატომ გადაწყვიტეთ რომ გამხდარიყავით სტუ-ს სამართლისა და საერთაშორისო ურთიერთობის ფაკულტეტის სტუდენტი?

მიუხედავად იმისა, რომ ხშირად მირჩევდნენ ჩამებარებინა ჟურნალისტიკაზე, საბოლოოდ არჩევანი მაინც იურიდიულ ფაკულტეტზე შევაჩერე, და ვფიქრობ რომ ჩემს ცხოვრებაში ერთ-ერთი სწორი გადაწყვეტილება მივიღე. რაც შეეხება უნივერსიტეტს სიმართლე გითხრათ თავიდან არ მიფიქრია ტექნიკურ უნივერსიტეტში ჩაბარება, თუმცა უპირატესობა მაინც სახელმწიფო უნივერსიტეტებს მივანიჭე, რის შედეგადაც გავხდი საქართველოს ტექნიკური უნივერსიტეტის სტუდენტი.

3.გვიამბეთ თქვენი  სტუდენტური ცხოვრების შესახებ?

      ჩემი სტუდენტური ცხოვრება სწორედ  ისეთია როგორიც ყოველთვის  წარმომედგინა, აქტიური და საინტერესო. ამ ორი წლის განმავლობაში მქონდა ბედნიერება შევხვედროდი მაღალი   კვალიფიკაციისა და განათლების მქონე  პროფესორებს, მიმეღო მათგან ცოდნა და გამოცდილება.  უნივერსიტეტის საშუალებით შევიძინე  არაჩვეულებრივი მეგობრები ჯგუფელების, კურსელებისა და პროფესორ-მასწავლებლების  სახით. სწავლის პირველივე დღიდან  ვცდილობ არ გამოვტოვო არცერთი საინტერესო და შემეცნებითი ხასიათის ტრენინგი, პროექტი თუ ღონისძიება, რომელიც მნიშვნელოვანი იქნება ჩემთვის როგორც მომავალი იურისტისთვის. აგრეთვე ვცდილობ სისტემატიურად დავესწრო ფაკულტეტის მიერ გამართულ  საჯარო ლექციებსა და შეხვედრებს, სადაც განიხილება აქტუალური და მნიშვნელოვანი საკითხები.

4. არაერთ პროექტში მიგიღია მონაწილეობა და იქნებ ამის შესახებაც მოგვიყვეთ?

    სტუდენტობის პირველივე წელს მომეცა შესაძლებლობა მონაწილეობა მიმეღო საზაფხულო სკოლის პროექტში „საკონსტიტუციო სამართალწარმოება“, რომელმაც დიდი როლი ითამაშა ჩემს პროფესიულ განვითარებაში,  გარდა ამისა პროექტის ფარგლებში  გავიცანი ჩემი მომავალი მეგობრები და მათთან ერთად გავატარე შვიდი მართლაც რომ შთამბეჭდავი  დღე.  აგრეთვე გავიარე 6 თვიანი სტაჟირება უნივერსიტეტის სამართლის კლინიკაში, სადაც შესაძლებლობა მქონდა თეორიული ცოდნა პრაქტიკაში გამომეყენებინა და კლიენტებისათვის გამეწია იურიდიული კონსულტაცია. არ შემიძლია უღრმესი მადლობა არ გადავუხადო ჩემს უსაყვარლეს ლექტორს  თამარ კაპანაძეს, რომლმაც მომცა შესაძლებლობა, რომ  დავსწრებოდი თელავის რაიონულ სასამართლოში მის მიერ ჩატარებულ პროცესებს და თავად გამხდარიყავი მოწმე იმისა თუ რაოდენ მძიმე და საპასუხისმგებლოა იყო მოსამართლე.

5. რას ეტყოდით ფაკულტეტის ადმინისტრაციას და პირველ რიგში დეკანს, პროფესორ ირაკლი გაბისონიას?

     დიდი მადლობა მინდა ვუთხრა  ფაკულტეტის დეკანს, ბატონ ირაკლი გაბისონიას რომელიც  ყოველთვის ცდილობს  გვერდში დაუდგეს სტუდენტებს და გაითვალისწინოს მათი ინტერესები. სწორედ რომ მისი დაუღალავი შრომითა და ძალისხმევით მოხდა სამართლისა და საერთაშორისო ურთიერთობების ფაკულტეტის გამოყოფა, რომელიც ერთ-ერთი წინ გადადგმული ნაბიჯი იყო. აგრეთვე მადლობას ვუხდი ფაკულტეტის ადმინისტრაციას რომლის თითოეული წევრი მუდამ მზადყოფნაშია დახმარება გაუწიოს სტუდენტებს. აბიტურიენტი რომ ვიყო, აუცილებლად   ავირჩევდი  ტექნიკურ უნივერსიტეტს.  პირველ რიგში იმიტომ რომ, ჩვენი უნივერსიტეტი არის ადგილი სადაც თითოეულ სტუდენტს აქვს რეალური შესაძლებლობა განვითარდეს, მიიღოს ცოდნა და, რა თქმა უნდა, მიაღწიოს დასახულ მიზანს. ფაკულტეტის აკადემიური პერსონალი, რომელიც დაკომპლექტებულია უშუალო და მეგობრული ადამიანებით, სტუდენტს შესაძლებლობას აძლევს თავისუფალ და კომფორტულ გარემოში მიიღოს განათლება, რაც ძალიან მნიშვნელოვანია ჩემთვის როგორც სტუდენტისათვის.

6. რას ელით ბაკალავრიატის სწავლების დარჩენილი ორი წლიდან და აპირებთ თუ არა მაგისტრატურაში ჩაბარებას?

ვისურვებდი რომ შემდგომი ორი წელიწადი ისეთივე წარმატებული და ნაყოფიერი ყოფილიყოს , როგორიც განვლილი ორი კურსი იყო. ვფიქრობ რომ ფაკულტეტი როგორც ყოველთვის შემოგვთავაზებს  სიახლეებს და მეც ვეცდები  მაქსიმალურად ჩავერთო ახალ გამოწვევებში. მიუხედავად იმისა, რომ მომავალს არასდროს ვგეგმავ და ყოველთვის ვცხოვრობ აწმყოთი, მოხარული ვიქნებოდი რომ ტექნიკური უნივერსიტეტის მაგისტრანტიც გავმხდარიყავი.

7. რას ურჩევთ პირველკურსელებს?

    პირველ რიგში მინდა თითოეულ მათგანს მივულოცო სტუდენტობა და ვუსურვო წარმატება. მე მათ ვურჩევ, რომ არ დაკარგონ არცერთი წამი და ნაყოფიერად გამოიყენონ სტუდენტობის 4 წელიწადი. სიზარმაცის გამო არ  გააცდინონ   ლექციები, შეძლებისდაგვარად მონაწილეობა მიიღონ ყველა ღონისძიებასა და პროექტში, რომელიც მათ პროფესიულ  განვითარებასა და წინსვლას შეუწყობს ხელს.  და ბოლოს მინდა ვუთხრა, რომ მათ ნამდვილად  გაუმართლათ რადგან მოხვდნენ იქ , სადაც  შრომა და მონდომება აუცილებლად ფასდება და მოდის დიდი წარმატება.

2017 წლის 16 ნოემბერს  საქართველოს ტექნიკურ უნივერსიტეტში ტარდება საერთაშორისო სამეცნიერო კონფერენცია “ მსოფლიო და გენდერი ”.

კონფერენციის თემა: “მსოფლიო და გენდერი”

კონფერენციის სამუშაო ენებია: ქართული, ინგლისური, რუსული

კონფერენციის მუშაობა წარიმართება შემდეგ სექციებში:

1. ქალი და პოლიტიკა;
2. გენდერული თანასწორობა და კანონი;
3. გენდერი: პარადიგმები და დილემები.

 კოფერენციაზე მუშაობის ფორმები:

• მოხსენებით გამოსვლა;
• დაუსწრებელი მონაწილეობა.

კონფერენციის მასალათა კრებული გამოქვეყნდება კონფერენციის დასრულების შემდეგ.

კონფერენციაში მონაწილეობის მსურველებმა ნაშრომი (სტატია) გამოაგზავნეთ 2017 წლის 2 ნოემბრამდე,  ელექტრონული ფოსტით, მისამართზე: kipianimaia@gmail.com, პროფესორ მაია ყიფიანის სახელზე.

მოთხოვნა:

სტატია გამოაგზავნეთ ელექტრონული ფოსტით Microsoft Word –ის ფორმატით თქვენთვის სასურველ ენაზე, არაუგვიანეს 2017 წლის 2 ნოემბრისა. ქართულ და რუსულ  ენებზე წარმოდგენილ სტატიას უნდა ახლდეს რეზიუმე ინგლისურ ენაზე არაუმეტეს 200 სიტყვისა.

სტატიის   მოცულობა – არაუმეტეს 7 გვერდისა

შრიფტი (ფონტი)— Times New Roman, 12pt (ინგლისური და რუსული ენებისთვის),  AcadNusx 12 pt (ქართული ენისთვის).

მინდორი (Margins) — ზედა –  2 სმ,  ქვედა – 2,5 სმ, მარცხნივ –  3 სმ, მარჯვნივ –  2 სმ.

საქართველოს პრეზიდენტის სარეზერვო ფონდის მხარდაჭერით, ა.ა.ი.პ. „დანაშაულობის კვლევისა და პროგნოზირების ცენტრი“ გრიგოლ რობაქიძის სახელობის კრიმინოლოგიის სამეცნიერო–კვლევით ინსტიტუტთან და საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტთან თანამშრომლობით ახორციელებს პროექტს „პროფესიული ეთიკის განვითარება“ .

პროექტი „პროფესიული ეთიკის განვითარება“ მიზნად ისახავს  უმაღლესი საგანმანათლებლო დაწესებულებების პროფესორ–მასწავლებლებს, სტუდენტებს, შესაბამისი სახელმწიფო დაწესებულებების მოსამსახურეებს და ამ საკითხით დაინტერესებულ ფართო საზოგადოებას მიაწოდოს   ცოდნა პროფესიული ეთიკის შესახებ და გამოუმუშაოს შესაბამისი უნარ–ჩვევები საერთაშორისო სტანდარტების გათვალისწინებით. ეს დაეხმარებათ, როგორც პროფესიული საქმიანობის განსახორციელებლად,  ისე ყოფით ცხოვრებაში.

პროექტის მიზანია სტუდენტები და მსმენელები დაეუფლონ ზოგადი და პროფესიული ეთიკის საფუძვლებს, საჯარო, სამართალდამცავ და სპეციალურ სამსახურების საქმიანობის ძირითად პრინციპებს, ამ სამსახურებში პროფესიული ეთიკისა და ქცევის თანამედროვე სტანდარტებს და გამოუმუშავდეთ  შესაბამისი უნარ–ჩვევები;

პროექტის ამოცანებია:

• გრიგოლ რობაქიძის სახელობის უნივერსიტეტის კრიმინოლოგიის სამეცნიერო–კვლევით ინსტიტუტში, ,,პროფესიული ეთიკის განვითარების ცენტრის’’ გახსნა, რომელშიც გაერთიანებული იქნებიან მეცნიერები და პრაქტიკოსები, უმაღლესი საგანმანათლებლო დაწესებულებების აკადემიური პერსონალი, სტუდენტები, სახელმწიფო დაწესებულებების მოსამსახურეები, არასამთვრობო ორგანიზაციების წარმომადგენლები და სხვა დაინტერესებული პირები.
• პროფესიული ეთიკის განვითარების ცენტრში მომზადდება:
• საჯარო, სამართალდამცავ და სპეციალურ სამსახურებში ეთიკის ნორმებსა და ქცევის წესებზე საერთაშორისო სამართლებრივი აქტების თარგმანი;
• უმაღლესი საგანმანათლებლო დაწესებულებებისათვის სასწავლო კურსის პროგრამა ,,პროფესიულ ეთიკა საჯარო, სამართალდამცავ და სპეციალურ სამსახურებში“;
• სახელმწიფო დაწესებულებებში, პროფესიული სწავლებისათვის მოკლევადიანი სპეციალური კურსი ,,პროფესიული ეთიკა საჯარო, სამართალდამცავ და სპეციალურ სამსახურებში’’;
• სახელმძღვანელო ,,პროფესიული ეთიკა საჯარო, სამართალდამცავ და სპეციალურ სამსახურებში’’.
• მოკლევადიანი (3 დღიანი) სპეციალური სასწავლო კურსის ჩატარება დაინტერესებული უმაღლეს საგანმანათლებლო და შესაბამისი სახელმწიფო დაწესებულებებისათვის.
• უმაღლეს საგანმანათლებლო დაწესებულებებში:გრიგოლ რობაქიძის სახელობის უნივერსიტეტში, საქართველოს ტექნიკურ უნივერსიტეტში, სოხუმის სახელმწიფო უნივერსიტეტში და დაინტერესებულ სახელმწიფო დაწესებულებებშისასწავლო კურსის  პროგრამის ,,პროფესიული ეთიკა საჯარო, სამართალდამცავ და სპეციალურ სამსახურებში’’ და სახელმძღვანელოს პრეზენტაცია–განხილვა;
• საზოგადოების ყურადღების გამახვილება, სახელმწიფო დაწესებულებების მოსამსახურეების ეთიკურ სტანდარტებზე და ამ მიზნით საინფორმაციო მასალების: კრებულის, ბანერისა და პლაკატის გამოცემა და ინტერნეტ სივრცეში გავრცელება;
• უმაღლეს საგანმანათლებლო და დაინტერესებული სახელმწიფო დაწესებულებების და არასამთავრობო ორგანიზაციების თანამშრომლობის ხელშეწყობა, სხვადასხვა დარგში, პროფესიული ეთიკისა და ქცევის წესების სტანდარტების ჩამოყალიბების მიზნით.

ასევე, გამოიცა საინფორმაციო კრებული საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტთან თანამშრომლობით და საქართველოს პრეზიდენტის სარეზერვო ფონდის მხარდაჭერით, გრიგოლ რობაქიძის სახელობის კრიმინოლოგიის სამეცნიერო–კვლევით ინსტიტუტში, „პროფესიული ეთიკის განვითარების“ პროექტის ფარგლებში.

გთავაზობთ საქართველოს ტექნიკური უნივერსიტეტის  სამართლისა და საერთაშორისო ურთიერთობების ფაკულტეტის ახალ რუბრიკას „გაიცანი სტუ-დენტი“, რომელიც საშუალებას მოგცემთ გაიცნოთ ჩვენი ფაკულტეტის სტუდენტები, რომლებიც გამორჩეულნი არიან მაღალი აკადემიური მოსწრებითა და საზოგადოებრივი საქმიანობით.

ამჟამად წარმოგიდგენთ სამართლისა და საერთაშორისო ურთიერთობების ფაკულტეტის მესამე კურსის სტუდენტს ნინო ხულუზაურს.

1. მოგესალმებით ნინო, რატომ მიიღეთ გადაწყვეტილება გამხდარიყავით სტუ-ს სამართლისა და საერთაშორისო ურთიერთობების ფაკულტეტის სტუდენტი?

ყოველთვის მქონდა სურვილი, ვყოფილიყავი იურისტი, ამიტომაც, ადრეული ასაკიდანვე აქტიურად ვიყავი ჩართული სხვადასხვა ღონისძიებებში, რომლებიც კიდევ უფრო დამაახლოვებდა ამ პროფესიასთან. აბიტურიენტობისას ჩემს მიზანს ნამდვილად არ წარმოადგენდა, ვყოფილიყავი სტუ-ს სტუდენტი, თუმცა ახლა ნამდვილად ვფიქრობ, რომ იმ იღბლიან ადამიანთა სიას მივეკუთვნები, ვინც საჭირო დროს საჭირო ადგილას აღმოჩნდა. დღეს კი ამაყად შემიძლია განვაცხადო, რომ ვარ ამ დიდი ისტორიის და მომავლის მქონე უნივერსიტეტის სტუდენტი.

2. რით იყო საინტერესო სტუ-ს სტუდენტური ცხოვრება ?

მესამე კურსზე ვარ, ჯერ მხოლოდ ორი წელია, რაც სტუ-დენტი მქვია და ეს წლები მართლაც ძალიან პროდუქტიული გამოდგა ჩემთვის, იმ ცოდნის და გამოცდილების მიღების მხრივ რაც, სამართლის და საერთაშორისო ურთიერთობების ფაკულტეტმა მომცა. შევიძინე არაჩვეულებრივი მეგობრები, ჩემი ჯგუფელების, კურსელების და ლექტორების სახით. უნივერსიტეტის სამართლის კლინიკაში, რომელიც უფასო იურიდიულ კონსულტაციას უწევს მსურველებს, გავიარე 6 თვიანი სტაჟირება, რამაც უდიდესი გამოცდილება შემძინა, როგორც მომავალ ადვოკატს და გადამადგმევინა  ნაბიჯი კარიერული წინსვლისაკენ. .აქტიურად ვიყავი ჩართული ფაკულტეტის მიერ ორგანიზებულ ღონისძიებებსა თუ ტრენინგებში და მომავალშიც ამავეს ვგეგმავ.

3. ფაკულტეტის მიერ ორგანიზებულ რომელ ღონისძიებას გამოყოფდით?

სამართლისა და საერთაშორისო ურთიერთობების ფაკულტეტი ჯერ მხოლოდ ერთი წლისაა, თუმცა ეს სრულიად არ უშლის ხელს ფაკულტეტის ხელმძღვანელობას განახორციელონ, არაერთი სამეცნიერო-პრაქტიკული ხასიათის ღონისძიება, მათ შორის გამოვყოფდი ამერიკის შეერთებული შტატების, მოქმედი მოსამართლეების მიერ ჩატარებულ საჯარო ლექციებს. ასევე, ფაკულტეტის ორგანიზებით ინტენსიურად ტარდება საჯარო ლექციები, რომლებიც ყოველთვის დატვირთულია აქტუალური და საინტერესო საკითხებით. სწორედ ამ ლექციების საშუალებით იღებენ სტუდენტები მეტ ცოდნას და ინფორმაციას, კომპეტენტური ადამიანებისაგან სხვადასხვა საკითხებზე.

4. რას გვეტყვით ფაკულტეტის აკადემიური პერსონალის შესახებ?

როგორც ზემოთ აღვნიშნე სამართლის და საერთაშორისო ურთიერთობების ფაკულტეტი ერთი წლის შესრულდა, ფაკულტეტი ასეთი სახით ჩამოყალიბებამდე მოქცეული იყო ბიზნეს-ინჟინერინგის ფაკულტეტის ქვეშ, რაც დიდ გაუგებრობას და უხერხულობას ქმნიდა. ეს გადაწყვეტილება ფაკულტეტის გამოყოფის შესახებ ნამდვილად სწორი და მისასალმებელია. უპირველესად მინდა  უდიდესი სიყვარული და პატივისცემა გამოვხატო იმ ადამიანების მიმართ, რომლებიც დიდი მონდომებითა და პროფესიონალიზმით უდგებიან თავიანთ საქმეს და ამით დიდი წვლილი შეაქვთ ჩვენ პროფესიულ განვითარებაში, მადლობას ვუხდი მათ ამ ყველაფრისათვის.

5. წარმოიდგინეთ, რომ ახლა ხართ აბიტურიენტი, აირჩევდით ისევ სტუ-ს?

რა თქმა უნდა, კი ავირჩევდი!! ერთხელ უკვე ვუშვებდი შეცდომას, რაც განპირობებული იყო იმ მწირი და არასწორი ინფორმაციით, რაც უნივერსიტეტზე მქონდა, საბედნიეროდ ძალიან გამიმართლა.

6. მოგვიყევით, იმ შესაძლებლობებზე რომელსაც ფაკულტეტი აძლევს სტუდენტებს?

ფაკულტეტი ნამდვილად გვთავაზობს მრავალფეროვან და აქტიურ სტუდენტურ ცხოვრებას, მეც გამოვიყენე ეს შესაძლებლობა და ჩავერთე სხვადასხვა პროექტებსა თუ ღონისძიებაში. სტუდენტებს აქვთ შესაძლებლობა იმიტირებულ სასამართლო პროცესებში, გაცვლით პროგრამებში, საზაფხულო სკოლასა და სტაჟირების პროგრამებში მიიღონ მონაწილეობა. ამიტომ ფაკულტეტი ძალიან დიდ შესაძლებლობებს აძლევს სტუდენტებს.

7. რას ეტყოდით, ფაკულტეტის ადმინისტრაციას, კერძოდ კი დეკანს, პროფესორ ირაკლი გაბისონიას?

უდიდეს მადლობას ვეტყვი დეკანს პროფესორ ირაკლი გაბისონიას და აგრეთვე მთელი ფაკულტეტის ადმინისტრაციას, იმისთვის რომ დიდი პროფესიონალიზმითა და პასუხისმგებლობით ეკიდებიან ნებისმიერ საკითხს, სწორედ ამ ყველაფრის შედეგია ის დიდი პროგრესი, რომელსაც ფაკულტეტი განიცდის და დიდი მადლობა ყველა სტუდენტის და განსაკუთრებით ჩემ გვერდით  დგომისთვის.

8. და ბოლოს, რა რჩევას მისცემდით წლევანდელ პირველკურსელებს?

მინდა ყველა პირველკურსელს მივულოცო სტუდენტობა!! ვუსურვებ ამ ოთხი შესანიშნავი წლის სწორ და რაციონალურ გამოყენებას, რადგან დრო ძალიან სწრაფად გადის.

2017 წლის 18 ოქტომბერს სტუ-ს აკადემიურმა საბჭომ დაამტკიცა სამართლისა და საერთაშორისო ურთიერთობების ფაკულტეტის  დეკანის პროფესორ ირაკლი გაბისონიას მიერ წარდგენილი პროექტი „საინჟინრო სამართალი“.

პროექტი დამტკიცდა, ვინაიდან სტუ, როგორც ქვეყნის ნომერ პირველი ტექნიკური უნივერსიტეტი, მუდმივად ისწრაფვის განახლებისა და სიახლეების დანერგვისაკენ. ამ თვალსაზრისით მეტად მნიშვნელოვანია ახალი სასწავლო პროგრამების შემოღება, რომლებიც ორიენტირებული იქნება ბაზრის მოთხოვნებზე.

აღნიშნული პროექტი წარმოადგენს კომბინირებულ საბაკალავრო პროგრამას, კერძოდ სამართლისა და ინჟინერიის ერთობლივი პროგრამა, რომელიც დაინერგება ცალკე სასწავლო პროგრამის „საინჟინრო ეკონომიკის“სახით.

საინჟინრო მეცნიერებისა და სამართლის ერთობლივი პროგრამა, რამდენადაც ჩვენთვის არის ცნობილი, არ დანერგილა არცერთ პოსტსაბჭოთა სივრცის უნივერსიტეტში. მაშასადამე, საქართველოს ტექნიკური უნივერსიტეტი, კერძოდ სამართლისა და საერთაშორისო ურთიერთობების ფაკულტეტი იქნება პირველი, რომელიც საფუძველს ჩაუყრის, დანერგავს და წარმატებით განახორციელებს აღნიშნულ კომბინირებულ საგანმანათლებლო კურსს.

საინტერესოა, ის ფაქტი, რომ მოცემული კურსი წარმატებით არის დანერგილი სიდნეის ტექნოლოგიურ უნივერსიტეტში. სიდნეის ტექნოლოგიური უნივერსიტეტის ვებგვერდის მიხედვით, ეს არის სამართლისა და ინჟინერიის ფაკულტეტის ერთობლივი კურსი, რომელიც მოიცავს სწავლებას და ტექნიკური საგნების სიღრმისეულ ცოდნას.

პროექტის განხორციელების მიზნით დაგეგმილია მთელი რიგი ღონისძიებები, რომელიც დაფინანსებულია სამართლისა და საერთაშორისო ურთიერთობების ბიუჯეტიდან.

აღნიშნული პროექტის ხელმძღვანელს წარმოადგენს სტუ-ს რექტორი, აკადემიკოსი არჩილ ფრანგიშვილი, პროექტის მენეჯერები იქნებიან: სამართლისა და საერთაშორისო ურთიერთობების ფაკულტეტის დეკანი პროფესორი ირაკლი გაბისონია, სტუ-ს სპიკერი, პროფესორი ჯემალ გახოკიძე და ასოცირებული პროფესორი გიორგი გორაძე.  დაკომპლექტებულია ასევე სამუშაო ჯგუფი, ხარისხის ექსპერტი და ტექნიკური პერსონალი. მათი ერთობლივი საქმიანობის შედეგად შეიქმნება ისეთი საბაკალავრო და სამაგისტრო პროგრამა, რომლის დასრულების შემდგომ სტუდენტს ექნება ორმაგი დიპლომი, როგორც ინჟინერის ასევე, სამართლის მიმართულებით. ასევე, შედგენილია პროექტის ბიუჯეტი რომელიც სამი ხარჯვითი ნაწილისაგან შედგება.

საქართველოს ტექნიკურ უნივერსიტეტს გააჩნია შესაბამისი მატერიალური და ინტელექტუალური ბაზა, რათა სათანადო მომზადების შემდეგ მოხდეს „საინჟინრო სამართლის“ როგორც ცალკე სასწავლო პროგრამის დანერგვა.  კურსდამთავრებულს ექნება შესაძლებლობა დასაქმდეს  როგორც: იურისტი ეკოლოგიური სამართლის, ტექნოლოგიური კანონმდებლობისა და სპეციალური სისხლის სამართლის სფეროებში, საინჟინრო კორპორაციების კონსულტანტი, იურისტკონსულტი ან მენეჯერი და ა.შ. მათ განუვითარდებათ კრიტიკული და ანალიტიკური  უნარ-ჩვევები ინდუსტრიაზე ძლიერი აქცენტებით, რაც აუცილებელია ინჟინერიასა და სამართალს შორის რთული კავშირების გასაგებად.კურსი განკუთვნილია სტუდენტებისთვის, რომელთაც სურთ მიიღონ უმაღლესი პროფესიული იურიდიული განათლების სრული კურსი საინჟინრო მეცნიერებების კვალიფიკაციასთან ერთად.

კურსი მოიცავს 264 კრედიტს, რომელიც სტუდენტებს აძლევს შესაძლებლობას, მიიღონ უმაღლესი განათლება ცალკე ტექნიკური მეცნიერებების ბაკალავრის და ცალკე სამართლის ბაკალავრის ხარისხით.

აღნიშნული პროექტი ფაკულტეტის დეკანის, პროფესორ ირაკლი გაბისონიას და აკადემიური დეპარტამენტის წარმომადგენლების მეირ შემუშავდა იურიდიულ მომსახურებაზე მზარდი მოთხოვნის გამო ისეთ სფეროებში, რომლებშიც საჭიროა რთული ტექნიკური საკითხების ცოდნა. ასეთი სპეციალისტების დიდი მოთხოვნილებაა, როგორც კერძო იურიდიულ ფირმებში, ისე მანქანათმშენებლობაში.

პროექტის ფარგლებში შემუშავდება როგორც უშუალოდ საინჟინრო სამართლის საბაკალავრო და სამაგისტრო პროგრამა, ასევე შეიქმნება სპეციალური ლიტერატურა ქართველის მეცნიერების მიერ, ითარგმნება უცხოური ლიტერატურა და საქართველოს განათლების და მეცნიერების სამინისტროსთან ერთად ჩამოყალიბდება სრულყოფილი სასწავლო პროგრამა.

ჩვენ ამაყნი ვართ, რადგან საფუძველი ჩაეყარა, უმნიშვნელოვანეს საქმეს, რომელიც სამართლისა და საერთაშორისო ურთიერთობების ფაკულტეტს დაუმკვიდრებს ღირსეულ სახელს საგანმანათლებლო სფეროში. ვინაიდან, აღნიშნული პროექტი ემსახურება საერთო მიზანს, ისეთი პროგრამის შემუშავებას და განხორციელებას, რომელიც პოსტსაბჭოთა სივრცეში ჯერ არცერთ უნივერსიტეტს არ გააჩნია.

გთავაზობთ საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ახალ რუბრიკას „გაიცანი სტუ-დენტი“, რომელიც საშუალებას მოგცემთ გაიცნოთ ჩვენი ფაკულტეტის სტუდენტები, რომლებიც გამორჩეულნი არიან მაღალი აკადემიური მოსწრებითა და საზოგადოებრივი საქმიანობით.

ამჟამად წარმოგიდგენთ მარიამ რობაქიძეს,  რომელიც სწავლობს სამართლისა და საერთაშორისო ურთიერთობების ფაკულტეტის სამართლის სპეციალობის მესამე კურსზე.

1. მოგესალმებით მარიამ, გვიამბეთ ცოტა რამ თქვენს ბავშვობაზე .

ჩვეულებრივი ბავშვი ვიყავი არაფერი განსაკუთრებული, უბრალოდ შეიძლება ითქვას რომ ყოველთვის ვიცოდი თუ რა მინდოდა, გარკვეული მიზნები და ამოცანები მქონდა დასახული.

2. რატომ გადაწყვიტეთ სტუ-ში ჩაბარება, მაშინ როცა უკვე დამთავრებული გქონდათ სხვა უნივერსიტეტი?

ყოველთვის მინდოდა იურიდიული განათლებაც მქონოდა, რადგან მიმაჩნდა და ახლაც ასე ვფიქრობ, რომ კარგი ბიზნესმენი იურიდიულ საკითხებშიც  უნდა ერკვეოდეს. ზოგადად ვფიქრობ რომ კომპლექსური განათლება აუცილებელია თანამედროვე სამყაროში მცხოვრები ადამიანისთვის წარმატების მისაღწევად.

რაც შეეხება იმას, თუ რატომ ავირჩიე კონკრეტულად საქართველოს ტექნიკური უნივერსიტეტი. მისი არაერთგვაროვანი რეპუტაციიდან გამომდინარე მაინც ვფიქრობ, რომ სტუდენტების იმ კატეგორიას, რომელსაც სწავლა უნდა ეს უნივერსიტეტი და ფაკულტეტი აძლევს ამის საშუალებას. მეტიც, წარმატებული სტუდენტები მეტად დაფასებულნი არიან და კიდევ უფრო დიდი მოტივაცია უჩნდებათ სწავლისადმი.

3. მოგვიყევით თქვენი სტუდენტური აქტივობის შესახებ?

ნამდვილად მრავალფეროვანი სტუდენტური ცხოვრება მაქვს. პირველი კურსიდან ვიღებდი მონაწილეობას სხვადასხვა პროექტებში, იყო ეს ბიზნეს მარათონი, სოციალური მეწარმეობის მხარდამჭერი კონკურსი, თი-ბი-სი ბანკისა და უნივერსიტეტის მიერ ერთობლივი პროექტი მარკეტინგსა და პიარში, სხვადასხვა სტაჟირებები და სამსახურები კერძო თუ საჯარო სექტორში. ეს ის მცირე ჩამონათვალია, რაც უცბად გამახსენდა კიდევ იყო ბევრი რამ რომლის ჩამოთვლასაც არ დავიწყებ.

4. რა გაგიკეთებიათ სტუ-ს სამართლისა და საერთაშორისო ურთიერთობების ფაკულტეტის ფორმატში?

ფაკულტეტის ფორმატში ვიყავი საკონსტიტუციო სასამართლოში, ერთკვირიან ტრენინგზე. რომელიც ძალიან საინტერესო იყო ჩემთვის, როგორც მომავალი იურისტისთვის. ასევე, გავხდი კონსტიტუციონალიზმის ცენტრის წევრი. გული მწყდება რომ ჩემი მოუცლელობის გამო კიდევ ბევრი  შესაძლებლობა გავუშვი ხელიდან და საინტერესო პროექტი გამოვტოვე.

5. რა არის თქვენი სამომავლო გეგმები?

სამომავლო გეგმებს რაც შეეხება, ამჟამად ვროცლავის უნივერსიტეტში ვაგრძელებ სწავლას სამაგისტრო პროგრამაზე. საქართველოში დაბრუნებისთანავე ვაპირებ დასაქმებას და სწავლის გაგრძელებას.

6. როგორ ხედავთ თქვენს თავს 5 წლის მერე?

5 წლის შემდეგ მინიმუმ ორი ბაკალავრის და ორი მაგისტრის დიპლომი მექნება, ეს რაც ზუსტად ვიცი და თითქმის დარწმუნებული ვარ, რომ ისეთ ადგილას ვიქნები დასაქმებული, სადაც ჩემი შესაძლებლობების მაქსიმუმის გამოვლენას შევძლებ.  უფრო შორს თუ წავალთ,  ჩემს თავს რომელიმე დიდი კომპანიის ბიზნეს იურისტად ვხედავ.

7. გვითხარით, ისეთი თანამდებობა რომელზეც ოცნებობთ?

ოცნების თანამდებობა 8 წლიდან უცვლელი მაქვს, ბავშვობიდან პარლამენტის თავჯდომარეობაზე ვოცნებობდი და ჯერ-ჯერობით აზრი არ შემიცვლია.

8. ცოტა რამ ფაკულტეტის ხელმძღვანელობაზეც მოგვიყევით.

არც ისე ცოტა უნივერსიტეტთან მქონია შეხება და მინდა გითხრათ რომ ასეთი გულისხმიერი ხელმძღვანელობა არ შემხვედრია. ნებისმიერ საკითხზე და პრობლემაზე შეგიძლია უპრობლემოდ  მიხვიდე, მოგისმენენ, ყველანაირად შეეცდებიან დაგეხმარნონ.  სამართლისა და საერთაშორისო ურთიერთობების ფაკულტეტის ხელმძღავნელობა არაა მიუწვდენელი სტუდენტებისთვის. რაც მიმაჩნია რომ უმთავრესია წარმატებული მმართველობისთვის. არ არსებობს პრობლემა, რომელსაც ისინი არ მოგიგვარებენ.  სხვა უნივერსიტეტებისგან განსხვავებით აქ ადამიანური ურთიერთობები ბევრად მაღლა დგას.

9. 9. რას ურჩევთ სტუ-ს პირველკურსელებს ?

პირველ რიგში, დაივიწყონ ის ფაქტი რომ “გეპეი”-ში სწავლა არაა. გაიაზრონ ის რომ 4 წელიწადში უნდა ისწავლონ ის რითაც შემდეგ ცხოვრება მოუწევთ. გამოიყენონ ყველა შესაძლებლობა რასაც ფაკულტეტი სთავაზობს. იაქტიურონ,  რაც შეიძლება მეტი გამოცდილება და ცოდნა დააგროვონ ამ წლების მანძილზე, რადგან შემდეგ ამის დრო აღარ  ექნებათ. და ბოლოს გაერთეთ, ძალიან მაგარია STU-დენტი რომ ხარ 😉

სტუ-ს სამართლისა და საერთაშორისო ურთიერთობების ფაკულტეტის სამართლის მაგისტრატურის სტუდენტი იაკო ხაინდრავა 2017 წელს მონაწილეობას იღებდა Evropa Universiti Viadrina-ს მიერ ორგანიზებულ პროექტში”  Evropean system of hummer rights protection”. 

აღნიშნულ პროექტში მონაწილეობას იღებდნენ მსოფლიოს სამოცამდე ქვეყნის წარმომადგენლები, მათ შორის, საქართველოდან სტუდენტი იაკო ხაინდრავა.  ორი კვირის მანძილზე გერმანიაში, კერძოდ ფრანქფურტში უტარდებოდათ ლექციები და სემინარები ადამიანის უფლებების აქტუალურ საკითხებზე. სტუდენტებს  ევროპის სხვადასხვა ქვეყნიდან მოწვეული ლექტორები უკითხავდნენ ლექციებს, რის შემდგომაც ერთობლივად ჩაატარეს იმიტირებული სასამართლო პროცესი, სადაც ჩვენი სტუდენტი წარმოადგენდა აპლიკანტის მხარეს. აღნიშნული პროექტის დასასრულისას უნივერსიტეტის ორგანიზებითვე სტუდენტებმა დაათვალიერეს ბერლინში პარლამენტი და სხვა ღირსშესანიშნაობები.

2017 წლის ოქტომბერს სტუ-ს სამართლისა და საერთაშორისო ურთიერთობების ფაკულტეტის  საერთაშორისო ურთიერთობების სპეციალობის სტუდენტი გურანდა გოლიაძე, დეკანის პროფესორ ირაკლი გაბისონიას მხარდაჭერით და ფაკულტეტის დაფინანსებით მონაწილეობას იღებდა საერთაშორისო გაცვლით პროგრამაში- “Create an exchange – experience diversity”.

ჩვენს სტუდენტს პროგრამის ფარგლებში ურთიერთობა ჰქონდა მსოფლიოს 15 სხვადასხვა ქვეყნის წარმომადგენელთან, რამაც მისცა საშუალება  გაეცნო  სხვადასხვა ქვეყნის ისტორია, რაც მისი პროფესიული და პიროვნული ზრდის აუცილებელ პირობას წარმოადგენს. პროექტი იმართებოდა გერმანიის სხვადასხვა ქალაქში  კერძოდ, დიუსელდორფში, დუისბურგში, ქანსთენში, კალაქარში, ემერიჩში, ბონში, კოლონში და ასევე  ამსტერდამში (ჰოლანდია). სტუდენტები ეცნობოდნენ გერმანიაში სხვადასხვა ორგანიზაციის მუშაობას, მათ შორის “Hephata”, რომელთანაც პროექტის განმავლობაში თანამშრომლობდნენ. ორგანიზაციასთან მუშაობის პროცესში ეცნობოდნენ გერმანულ სისტემას შეზღუდული შესაძლებლობის მქონე პირებისთვის, თუ როგორ და რა პირობებში უზრუნველყოფს სახელმწიფო ადამიანის ცხოვრებას და სრულ დაფინანსებას.

აღნიშნული პროექტი სამ კვირას გაგრძელდა, რამაც სტუდენტს მისცა შესაძლებლობა გაეუმჯობესებინა უცხო ენა და ასევე, შეესწავლა აღნიშნული ქალაქების ტრადიციები და ა.შ.