2017 წლის მაისში  უკრაინაში ქალაქ ზაპოროჟიეს სახელმწიფო ნაციონალურ ტექნიკური უნივერსიტეტის იურიდიული ფაკულტეტსა და   საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტს შორის გაფორმებული მემორანდუმის საფუძველზე, 2017 წლის 16-17 ნოემბერს ფაკულტეტზე სამუშაო ვიზიტით იმყოფებიან ზაპოროჟიეს სახელმწიფო ნაციონალური ტექნიკური უნივერსიტეტის იურიდიული ფაკულტეტის  სისხლის, სამართლის კათედრის ხელმძღვანელი იურიდიულ მეცნიერებათა დოქტორი, სრული პროფესორი, უკრაინის დამსახურებული იურისტი ქალბატონი ტატიანა ლეონენკო  და უკრაინის იურიდიულ მეცნიერებათა დოქტორი, კრიმინალისტიკისა და სისხლის სამართლის პროცესის სპეციალისტი, უკრაინის კრიმინოლოგთა ასოციაციის წევრი მაქსიმ ლეონენკო.

თანამშრომლობის ფარგლებში პირველ ეტაპზე გაიმართა უახლესი თანამედროვე, მაღალი დონის კრიმინოლოგიის სახელმძღვანელოს პრეზენტაცია უკრაინელი კოლეგების მონაწილეობით.

16 ნოემბერს უკრაინის დამსახურებულმა იურისტმა ქალბატონმა ტატიანა ლეონენკომ საჯარო სამართლის ლაბორატორიაში საჯარო ლექცია წაუკითხა ფაკულტეტის სტუდენტებს და პროფესორ-მასწავლებლებს უახლესი კრიმინოლოგიური დარგის საკრალური კრიმინოლოგიის სწავლების შესახებ. შეხვედრამ კითხვა-პასუხის რეჟიმში ჩაიარა.

2017 წლის 16 ნოემბერს სტუ-ს საკონფერენციო დარბაზში სტუ-ს გენდერული თანასწორობის კვლევითი ცენტრის ორგანიზებით და სამართლისა და საერთაშორისო ურთიერთობების ფაკულტეტის მხარდაჭერით გაიმართა საერთაშორისო სამეცნიერო კონფერენცია თემაზე: „მსოფლიო და გენდერი“.  კონფერენციას ორგანიზება გაუწია  სტუ-ს გენდერული თანასწორობის კვლევითი ცენტრის დამფუძნებელმა პროფესორ მაია ყიფიანმა, რომელიც ცენტრის ფარგლებში მეოთხედ ატარებს საერთაშორისო დონის კონფერენციას.

კონფერენცია გახსნა სტუ-ს რექტორის მოადგილემ ზურაბ გასიტაშვილმა, რომელმა მიულოცა  მონაწილეებს კონფერენციის გახსნა, ისაუბრა გენდერთან დაკავშირებული თემის აქტუალობაზე და წარმატებები უსურვა ფაკულტეტს. ასევე, მადლობა გადაუხადა სამართლისა და საერთაშორისო ურთიერთობების ფაკულტეტის დეკანს პროფესორ ირაკლი გაბისონიას.

კონფერენციის მონაწილეებს მიესალმა სტუ-ს სამართლისა და საერთაშორისო ურთიერთობების ფაკულტეტის დეკანი, პროფესორი ირაკლი გაბისონია, მან მადლობა გადაუხადა პროფესორ მაია ყიფიანს გაწეული სამსახურისთვის და წარმატებები უსურვა  მონაწილეებს.

ასევე სიტყვით გამოვიდნენ რევაზ მიშველაძე, იგორ კვესელავა და სხვა პროფესორები, რომლებმაც საკუთარი აზრი დააფიქსირეს გენდერულ პრობლემასთან მიმართებაში.

 კონფერენციის სამუშაო პროგრამა საკმაოდ მრავალფეროვანი და მრავალრიცხოვანი იყო. მომხსენებლებმა ძალზედ მნიშვნელოვანი თემები წამოჭრეს, სულ 59 მომხსენებელი წარდგა საზოგადოების წინაშე, მათი განხილვა კონფერენციის ფორმატში კი საინტერესო აღმოჩნდა დამსწრე საზოგადოებისთვის.

კონფერენციის ასპარეზი გაზარდა იტალიიდან მომხსენებლების ჩართვამ.  დოქტორმა რომინა გურაშმა და დოქტორანტმა ნენო გაბელიამ საზოგადოებას გააცნეს გენდერულ საკითხებთან დაკავშირებით თავიანთი კვლევის შედეგები.

პროფესორ ირაკლი გაბისონიამ ასევე ისაუბრა ოჯახში ძალადობის პრობლემების შესახებ და მოიშველია არაერთი სტატისტიკა, განმარტა ოჯახური ძალადობის ასპექტები და პრევენციის მნიშვნელობას გაუსვა ხაზი.

კონფერენციის დასასრულს პროფესორ მაია ყიფიანმა შეაჯამა მოხსენებები, მადლობა გადაუხადა მონაწილეებს და სამომავლო გეგმებზეც ორიოდე სიტყვით ისაუბრა.  აღნიშნული კონფერენცია მომავალ წელსაც გაიმართება ისევ სამართლისა და საერთაშორისო ურთიერთობების ფაკულტეტის მხარდაჭერით.

2017 წლის 16 ნოემბერს საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის ორგანიზებით სტუ-ს ცენტრალურ ბიბლიოთეკაში გაიმართა ირაკლი მინაშვილის  წიგნის „არასრულწლოვანთა მართლმსაჯულების კოდექსის კომენტარები“-ს პრეზენტაცია.

აღნიშნულ პრეზენტაციაზე მოწვეულნი იყვნენ: თბილისის საქალაქო სასამართლოს მოსამართლე ქალბატონი ეკა გაბრიჩიძე, ვაკე-საბურთალოს რაიონის პროკურორი ბატონ შოთა რიჟამაძე;საქართველოს მთავარი პროკურატურის საპროკურორო საქმიანობაზე, ზედამხედველობისა და სტრატეგიული განვითარების დეპარტამენტის პროკურორი ალექსანდრე იმედაშვილი, თბილისის პრობაციის ბიუროს უფროსის მოადგილე ბატონი შავლეგ თოდუა;გაეროს ბავშვთა ფონდის (UNICEF) ბავშვთა დაცვის პროგრამის (არასრულწლოვანთა მართლმსაჯულების) ხელმძღვანელი ქალბატონ თეონა კუჭავა; დანაშაულის პრევენციის ცენტრის  განრიდებისა და მედიაციის სამმართველოს უფროსი ბატონი ლადო ჯავახიშვილი; შინაგან საქმეთა სამინისტროს  აკადემიის ხარისხის უზრუნველყოფის სამმართველოს პროფესიული განათლების განყოფილების უფროსის მოადგილე ბატონ დიმიტრი დინუაშვილს.

ირაკლი მინაშვილის  წიგნის პრეზენტაცია გახსნა და სტუმრებს მიესალმა საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის დეკანი ბატონი ირაკლი გაბისონია, რომელმაც ისაუბრა ირაკლის პიროვნულ და პროფესიულ მახასიათებლებზე, ხაზი გაუსვა მის შრომისუნარიანობას და მადლობა გადაუხადა დამსწრე საზოგადოებას მობრძანებისათვის.

თითოეულმა მოწვეულმა სტუმარმა წარმოადგინა საკუთარი მოსაზრებები, ჩამოაყალიბეს წიგნთან მიმართებაში შეხედულებები და წიგნის ავტორის უდიდესი წარმატებები უსურვეს.

აღნიშნულ პრეზენტაციაზე მოწვეული სტუმრების შემდგომ ასევე სიტყვით გამოვიდნენ სამართლისა და საერთაშორისო ურთიერთობების ფაკულტეტის პროფესორ-მასწავლებლები, მათ შორის, სისხლის სამართლის აკადემიური დეპარტამენტის ხელმძღვანელი ჯემალ ჯანაშია დეა პროფესორი მიხეილ მამნიაშვილი.

მადლობა გადაუხადეს წიგნის ავტორს სტუდენტებმა შახლა ისაევამ და გურამ ლობჟანიძემ.

შეხვედრის დასასრულს ირაკლი მინაშვილმა უღრმესი მადლობა გადაუხადა მხარდაჭერისათვის საქართველოს ტექნიკური უნივერსიტეტს, კერძოდ კი სამართლისა და საერთაშორისო ურთიერთობების ფაკულტეტის ხელმძღვანელობას, დეკანს პროფესორ ირაკლი გაბისონიას, დეკანის მოადგილეს, პროფესორ ჯემალ გაბელიას და სისხლის სამართლის დეპარტამენტის ხელმძღვანელს პროფესორ ჯემალ ჯანაშიას.

2017 წლის 15 ნოემბერს ქართველ სისხლის სამართლის პროფესორ-მასწავლებელთა გაერთიანების პირველი კონფერენცია გაიმართა, რომელიც ჩატარდა თემაზე: „ნარკოტიკული დანაშაულის აქტუალური საკითხები“.

აღნიშნული გაერთიანება დაფუძნებულია სამართლის დოქტორ ქეთევან მჭედლიშვილი-ფიდრიხის ინიციატივით.

კონფერენციაში  მონაწილეობდა საქართველოს ტექნიკური უნივერსიტეტის სამართლისა და საერთაშორისო ურთიერთობების ფაკულტეტის სისხლის სამართლის დეპარტამენტის ხელმძღვანელი პროფესორი ჯემალ ჯანაშია, რომელმაც დამსწრე საზოგადოებას წარუდგინა თემა: „მსოფლიო ნარკოპოლიტიკა და საქართველოს ნარკოსტრატეგიის პრობლემები“.

კონფერენციაში ასევე მონაწილეობდნენ პროფესორები: ირაკლი ბურდული, გიორგი შარვაშიძე. მინდია უგრეხელიძე, ნინო გვენეტაძე, მერაბ ტურავა, ბერნდ ჰაინრიხი, მორის შალიკაშვილი, გიორგი ღლონტი, ჯემალ ჯანაშია, თამარ სადრაძე და სხვები.

კონფერენციაზე მიწვეული იყო სტუ-ს სპიკერი პროფესორი ჯემალ გახოკიძე და სტუ-ს სამართლისა და საერთაშორისო ურთიერთობების ფაკულტეტის  დეკანი, პროფესორი ირაკლი გაბისონია.

2017 წლის 15 ნოემბერს სტუ-ს სამართლისა და საერთაშორისო ურთიერთობების ფაკულტეტის სტუდენტებისათვის მსოფლიოში ცნობილმა პროფესორმა ვალტერ იეშკემ საჯარო ლექცია ჩაატარა თემაზე: „რელიგია და სამართალი“.

აღნიშნული შეხვედრა გახსნა სტუ-ს სამართლისა და საერთაშორისო ურთიერთობების ფაკულტეტის დეკანმა პროფესორმა ირაკლი გაბისონიამ. მან გააცნო სტუდენტებს ინფორმაცია პროფესორის შესახებ და მადლობა გადაუხადა მას საქართველოში ვიზისთვის.

სტუდენტები აქტიურად დაინტერესდნენ პროფესორის მიერ წამოყენებული საკითხებით, მოისმინეს მისეული ხედვა პრობლემურ თეზისებთან მიმართებაში  და გამართეს დისკუსია, რაშიც აქტიურად ჩაერთვნენ როგორც სტუდენტები ასევე პროფესორ-მასწავლებლებიც. შეხვედრას ასევე ესწრებოდა სტუ-ს მოწვეული პროფესორი ფილოსოფიის დოქტორი იოსებ ბაჩიაშვილი, რომელმაც სტუმარს გააცნო ჩვენეული ტრადიციებისა და ხედვების შედეგად ჩამოყალიბებული მიდგომები და დამოკიდებულებები.

სტუ-ს სამართლისა და საერთაშორისო ურთიერთობების ფაკულტეტი მადლობას უხდის გერმანელ პროფესორს ვალტერ იეშკეს გაწეული შრომისთვის და იმედოვნებს რომ სამომავლოდაც გაგრძელდება ორმხრივი თანამშრომლობა.

2017 წლის 15 ნოემბერს სტუ-ს სამართლისა და საერთაშორისო ურთიერთობების ფაკულტეტის პირველკურსელებს კრიმინალისტიკის ლაბორატორიაში  გაცნობითი შეხვედრა ჩაუტარდათ. სტუდენტებმა  დეკანის მოადგილის პროფესორ ჯემალ გაბელიასგან მოისმინეს ინფორმაცია კრიმინალისტიკის ლაბორატორიაშია არსებული მოწყობილობების შესახებ, პროფესორი ლაბორატორიის ფუნქციებსა და მუშაობის მეთოდიკაზე დაწვრილებით ესაუბრა სტუდენტებს.

სტუ-ს პროფესიული პროგრამის კრიმინალისტიკის ოთხივე საფეხურის კურსდამთავრებულმა სტუდენტმა ლაშა ძაგანიშვილმა პირველკურსელებს პრაქტიკული რეკომენდაციები მისცა.  გააცნო თითის კვლების აღების მეთოდიკა და სხვა ტექნიკური საშუალებების გამოყენება.

პირველკურსელები აქტიურად დაინტერსდნენ სისხლის სამართლის მიმართულებით, ასევე, გამოთქვეს სურვილი სამომავლოდ დასწრებოდნენ პრაქტიკულ მეცადინეობებს და მიეღოთ უფრო მეტი ინფორმაცია კრიმინალისტიკის ლაბორატორიაში განხორციელებული საქმიანობის შესახებ.